Azken udalbatza agiria ezin dela onartu dio Mutrikuko EH Bilduk
Mutrikuko EH Bilduk salatu duenez, urriaren 5ean burutatako udalbatzan hartutako erabakia “onartezina” da. “Gure ustetan, eta oraintsu jakin dugunez, bertan sinatu zen batzar agiria ezin liteke onartu. Izan ere, egun horretan burutako ez ohiko udalbatzarrean ez zen ezer erabaki”.
EH Bilduko zinegotziek nabarmendu dutenez, alkatearen kalitatezko botoa ezin daiteke lehen bozketaren ondoren erabili. “Kasu horretan, bigarren bozketa egin beharko litzateke, eta bozketa horretan berdinketak jarraituko balu, alkateak orduan erabili ahal izango luke bere kalitatezko botoa, baina ez arinagoko bozketa batean”.
Lehen bozketan berdinketa egon ostean bigarren bozketa bat ez egitea, hortaz, tokiko entitateen, organizazioa, funtzionamendua eta ikuspegi juridikoa onartzen dituen azaroaren 28ko 2568/1986ko errege dekretuaren 100.2 artikuluaren aurka joango litzatekeela deritzote.
Hitzarmena indarrean
Errege dekretu hori aintzat hartuta, ez ohiko bilkura hartan ez zela inolako erabaki irmorik hartu adierazi dute EH Bildukoek, eta hortaz, 2014ko abenduaren 23an Gipuzkoako Foru Aldundiaren eta Mutrikuko Udalaren artean Mijoako enpresa haztegia eta eraldaketa gunea eraikitzeko onarturiko Lankidetza Hitzarmenak, oraindik orain, indarreran dirauela berretsi dute. “Horren arabera, zera eskatzen dugu Mutrikuko EH Bilduko sei zinegotziok: Mijoako enpresa haztegia eta eraldaketa gunea eraikitzeko udalak jasoriko 500.000 euroak ez itzultzeko, eta bueltatuta baleude, berriro ere eskatzeko”.
Eskaera horrez gain, udalbatza osatzen dute gainontzeko taldeei “Mutrikuren eta lehen sektorearen egoera tamalgarria ezagututa”, Lankidetza Hitzarmen hori bere horretan mantentzea eskatzen die EH Bilduk.
Urriaren 5ean Mutrikun egindako udalbatza
