Konpostaren ikastaroa "oso arrakastatsua" izan dela dio Berriatuko Udalak
Auzokonposta eta auzokonpostaren inguruko ikastaroa egin zen urriaren 31n Berriatuan, udalak antolatuta. Ikastaroa “oso arrakastatsua” izan zela esan dute Berriatuko udal ordezkariek. “35 lagun inguruk parte hartu zuten. Gu oso pozik gaude emaitzagaz. Izan ere, denbora gutxiko tarteagaz antolatu genuen. Baina herritarrek oso ondo erantzun dute”, dio Julene Garate Berriatuko Udaleko Ingurumen zinegotziak.
Ikastaroan parte hartu zuten 35 herritar horietatik 25 auzokonposta egiteko prest agertu ziren; gainerakoek autokonposta egingo dute. “Informazio herriko etxe guztietara bidali genuen eta parte hartzea handia izan da; pozgarria izan zen”.
Momentuz, ikastaroa egin badute ere, Berriatuko Udalak gaia lantzen jarraitzeko konpromisoagaz jarraitzen duela gaineratu du Garatek. “Etorkizunera begira ere orain arte egindako lanketarekin jarraituko dugu. “Gure helburua ahalik eta herritar gehienek materia organikoa sailkatzea da”. Beraz, gai horrekin herritarren gehiengoa inplikatzeko eta sentsibilizatzeko lanean jarraituko dutela diote.
Konpostagailuen aurrean azalpen guztiak entzun ahal izan zituzten herritarrek. Argazkia: Berriatuko Udala.
Auzokonpostaren eta autokonpostaren gaineko azalpenak jaso zituzten herritarrek, bideo gelan. Argazkia: Berriatuko Udala
Konpostaren ikastaroan parte hartu zuten herritarrak. Argazkia: Berriatuko Udala
