Zazpigarren urteurrena ospatuko du Markina-Xemeingo Akerbeltz gaztetxeak
2008ko abenduak 6an zabaldu zituen ateak Markina-Xemeingo Akerbeltz gaztetxeak. Puxika koloretsuekin eta dotore-dotore jantzita inauguratu zuten hainbeste denboran amestutako gazteentzako topalekua. Herriko gazteei aisialdi eredu berri bat eskaintzeko gogoz ailegatu zen gazteek sortu eta kudeatutako egitasmoa, eta zazpi urte hauetan era askotako ekintzak burutu dituzte bertan: hitzaldi, antzerki, kontzertu, tailer eta abar luze bat.
Akerbeltzen historia guzti hori gogora ekarriko dute gazteek zapatuan [abenduak 5] ospatuko duten zazpigarren urteurren jaialdian. Horma irudi berri bat margotuko dute Plazabarripean eta oroitzapenerako tartea hartuko dute mokadutxoa hartzen duten bitartean.
Frontoi txikian jokatuko da pala txapelketako finala, eta urtero modura bazkaria egongo da ondoren, gaztetxean. Bazkaltzera joan nahi duenak Erlatx eta Patxua tabernetan erosi dezake txartelak. 7 euroren truke frijituak, gisatua, arroz esnea, kafea eta kopa edukiko ditu.
Bazkalosterako jolasak dituzte prestatuta eta elektrotxarangaren laguntzagaz kalejira egingo dute herrian zehar 18:00etatik aurrera.
Urtero modura, Akerbeltzen amaituko da jaia. Ogitartekoak izango ditu nahi duenak afaltzeko, eta 23:00etan hasiko da Pornox taldearen kontzertua. Jaiari azkenak emateko, Guri Bost taldearen erromeria izango dute.
Autogestioari begira
Azken hilabetea autogestioari tiraka igaro dute gazteek, euren eredua eraikitzeko bideri ekinda. Horrela, Iruñeako alde zaharreko esperientzia ezagutu eta bertatik ikasteko Euskal Jai gaztetxea hustu zuteneko dokumentala ikusi dute eta Gasteizera joan dira Errekaleor, Hala Bedi irratia eta Gasteizko gaztetxea ezagutzera. Urteurren jaian emango diote azaroan egin duten lanketa horreri amaiera.
EGITARAUA
Akerbeltz gaztetxearen inaugurazioa.
- 11:00. Gaztetxearen historia eta horma-irudi margoketa hamaiketakoagaz, Plazabarripean.
- 11:30. Pala txapelketako finalak frontoi txikian.
- 14:30. Bazkaria gaztetxean.
- Bazkalostean. Jolasak.
- 18:00. Elektrotxaranga kalerik kale gaztetxetik hasita.
- 21:30-23:00. Ogitartekoak gaztetxean.
- 23:00. Kontzertua: Pornox eta Guri Bost taldeak.
