Ibon Iparragirre etxeratzeko eskatuko dute Ondarroan LAB-ek eta IA-k
LAB sindikatuak eta Ikasle Abertzaleak erakundeak deituta, Ibon Iparragirre Burgoa larriki gaixorik dagoen euskal preso politiko ondarrutarra etxeratzeko eskatuko dute eguenean [abenduak 17], Ondarroan.
Ibon etxea! Euskal Presoak etxera ekarri behar ditugu lelopean Iparragirre eta gainontzeko preso gaixoen egoera salatu eta haien askatasuna eskatuko dute Ondarroako kaleetan barrena. “Ibonek egun bizi duen egoera kalera atera nahi dugu. Gabonak hain hurbil ditugun data hauetan, gainera, Ibonen eta gainontzeko presoen etxeratzea exijitzea beharrezkoa dela deritzogu”.
Mobilizazioa 11:30ean hasiko da Institutu inguruetan dagoen LABen egoitza aurretik, eta Alamedan amaituko dela iragarri dute. Bukaeran LABeko eta IAko ordezkariek manifestua irakurriko dute.
Gaiagaz lotuta, gainera, eta Institutuko ikasleek manifestazioan parte hartu ahal izateko, jolas orduaren hurrengo orduan geldialdia egingo dutela aurreratu dute. “Bozketa egin da, eta ikasleen gehiengoak ordubeteko geldialdia egitea erabaki du. Modu horretara, ikasleen ordezkaritza handi batek ere mobilizazioan parte hartzeko aukera izango du”.
Egoeraren larritasunaren aurrean LABek eta IAk presoak etxeratu arte lanean jarraituko dutela azpimarratu dute. “Preso politikoen eskubideen aldeko aldarrikapena lan eta ikasle munduan ere zabaltzea berebizikoa dela iruditzen zaigu. Euskal Herrian gatazka politikoaren benetako konponbidea nahi badugu euskal preso eta iheslari guztiak etxera ekarri behar ditugu, eta horretarako herria, tartean langileria eta ikasleria, kalera irten behar da”.
Ondarroako kaleetan egingo dituzten salaketen artean, Espainiako gobernuak darabilen “mendeku” politikagaz amaitzeko eskatuko dute. “Euskal preso politikoen kasuan, eta batez ere, preso gaixoen kasuan ez dira euren eskubideak bermatzen. Espainiako gobernuak, euskal gobernuak eta dagokien erakundeek horretarako asmorik ez baldin badute, herria izan beharko da horren inguruan lan egin beharko duena”.
Preso gaixoen alde Ondarroan egindako manifestazio bat
Ondarroan, Ibon Iparragirreren alde egindako manifestazio bat
