Urtza Alkorta: "Jendarteak zubia igaro du, baina beste hainbat zeharkatu behar ditugu"

2015/12/18

Orain bi urte eta erdi Ertzaintzak atxilotuta eraman zuen zubi beretik gertu elkarrizketatu du Hitzak Urtza Alkorta Arrizabalaga (Ondarroa, 1977). Guztira, bost urteko kartzela zigorra beste ostean, hilabete darama aske Alkortak. Etorkizuneko erronka berriei ekiteko ilusioz beteta eta gogotsu dagoela dio. Ezker abertzalean egindako lan politikoagatik atxilotu zintuzten. Oro har, gaur egun, nola ikusten duzu ezker abertzalea? Gure aurkako sarekada egin zutenean –2010eko urtarrilean–, estrategia aldaketa atarian ginen, prozesua martxan hasi besterik ez zen egin. Espetxetik irten nuen lehen aldian, prozesuari bueltata ari ziren, eta orain, egitura bera garai berrietara moldatzen hasita dago. Horregaz lotuta, ezker abertzaleak Abian deritzon prozesua abiatu du, Euskal Bideari indartsu ekiteko.

Alkortak itsaropentsu begiratzen dio etorkizunari

Abian prozesua laster aurkeztuko dute Ondarroan, ezta? Hilaren 26an talde dinamizatzailea zein izango den aurkeztuko da Kofradia Zaharrean. Espetxe barruan egonda, aldaketa horiek guztiak nola nabaritu dituzue kolektiboko kideek? Albisteak tantaka ailegatzen badira ere, jendea zain dagoela nabaritu dugu. Zeren zain? Ezker abertzaleak estrategia aldatu du, eta beste hainbat aurrerapauso eman badira ere, Espainiako Gobernuak ez du zirkinik ere egin. Ahaleginak alde bakarretik ematerakoan jendartea beste aldetik urratsak ikusteko zain sumatzen genuen. Gobernuak ez du eduki interesik ezer konpontzeko, ez orain eta ez lehen ere. Emango dituen pausoak, beti ere, herriak derrigortutakoak izango dira, eta horretarako beharrezkoa da indar metaketa. Askeguneagaz jendartearen zati handi bat aktibatzea lortu zen. Hori nola bizi izan zenuen? Askegunean bizi izandakoa ezin dut azaldu aurreko atxiloketa barik. Aurrekoa ez zen publikoa izan, inkomunikatuta izan gintuzten bost egunak Arkauten gogorrak izan ziren, ospitalera eta guzti atera behar izan gintuzten bi lagun. Hortik hasita jada… Ze desberdintasun? Lehen atxiloketan autobideko bidesari batean autotik atera eta atxilotuta eraman ninduten, pistola bat buruan ipinita, eta azken atxiloketan, ostera, herri oso bat horren lekuko zela eraman ninduten. Azken atxiloaldian, gainera, jendartearen aktibazioa ematen ari zela ikusteko aukera izan nuen zubian. Ze modutan? Egoera politikoa ere desberdina zen. Estrategia aldaketa, konponbide garaia, espetxeak husteko sasoia… eta desobedientziaren bidea ere, parametro horietan zabaltzen zen. Hori bai, zubi harre- sian gertaturikoa, bere edertasunean gogorra egin zitzaidan. Zergatik? Jendea hain modu bortitzean jipoitzen ari zirela ikustea ez zen atsegina izan. Baina, ederra ere izan zen. Kartzelara heldu nintzenean herriak ahal duela ikusi nuen inoiz baino argiago. Ideologia eta adin guztietako jendea batu ginen zubiaren inguruan, eta herria batu eta konponbidearen bidean aurrerapausoak ematea posible dela agerian geratu zen.

Alkorta: “Euskal Herriko hainbat txokotatik etorri zen jendea, eta hemen (Ondarroan) lortutako guztiak emandako pozagaz eraman ninduten espetxera”

Zein izan zen Askegunean lortu zen garaipenik handiena? Hemen batu zen jendeak jakin bazekien jipoitua, atxilotua… ahal zela izan, baina, hala ere, hemen batu ziren. Herri oso batengandik oso babestuta sentitu nintzen, Euskal Herriko hainbat txokotatik etorri zen jendea, eta hemen lortutako guztiak emandako pozagaz eraman ninduten espetxera; ditugun desberdintasunak alde batera laga eta batzen gaituenari helduta aurrera egitea posible dela jakiteak asko indartu ninduen. Espetxean zeuden beste kideei mezu hori helarazi nien: herria bizirik zegoela, eta posible zela, lortuko dugula!, eta hori inoiz ezingo diet eskertu bezain beste hara hurbildutako guztiei. Askegunean hainbat atxilotu egon ziren. Tartean zure neba, eta, ostean, epaituak izan ziren. Nola bizi izan duzu hori guztia? Furgoira sartu nindutenean neba eskuak atzea mahai batean makurtuta zutela ikusi nuen, zubiko azken irudia hori izan nuen. Bost lagun, tartean neba, epaituak izango zirela enteratu nintzenean izugarrizko amorrua eta inpotentzia sentitu nituen. Aurreko atxiloaldian jasandako torturak salatu genituen, eta gure abokatua auziperatua izan zen. Bigarren atxiloaldian ere, gure ingurukoak zigortuak izan ziren; jendea kolpatu eta jipoitu ostean, horiek isundu eta auziperatu zituzten eta.

Urtza Alkorta Arrizabalaga, zubi harresia eraiki zen zubiaren ondoan

Espetxe politikak bere horretan jarraitzen du. Sakabanatuta jarraitzen du euskal presoen gehiengoak, eta haien ingurukoek astero kilometro ugariko osterak egin behar izaten dituzte. Zelan bizi izan duzu egoera hau? Azken atxiloaldian Zaballan espetxeratu ninduten, baina jakin banekien, sakabanaketa politikak bere horretan jarraitzen duelako, han ez nindutela luzarorako utziko. Egun, Espainiako eta Frantziako Gobernuek espetxe politika bere horretan mantentzen dute, Euskal Herria lotuta izateko. Eta astero-astero senide eta lagunak dira kilometro horiek egiten dituztenak, horrek duen arrisku osoagaz. Estatuen bortizkeriak jarraitzen al du? Eman adibide bat. Begi bistan da: gaixo dauden presoak, epaiketak, jazarpen polizialak… Gaixorik dauden presoak, dauden egoeran kartzelan mantentzea mendeku politika da, herrian bertan dugu Ibon Iparragirreren kasu argia. Zer egin daiteke presoen eskubideen alde herri gisa aritzeko eta gaia mahaian jartzeko? Norbanako gisa pentsatuz gero, uste dugu ezer ezin dugula aldatu; «Zer egin dezaket nik?», eta horren aurrean argi izan behar dugu guztion artean lortuko dugula: tantaz tanta itsasoa egin daiteke eta. Dagokien gobernuek horretarako borondaterik ez badute ipintzen, herriak egin beharko du presoak etxeratzeko bidea. Makro epaiketek ere jarraitzen dute. Egunotan 35 euskal herritar Madrilen epaitzen ari dira. Horrelako epaiketak bizi dugun egoera berrian zilegi direla deritzozu? Zilegitasunik lehen ere ez zuten, eta orain are-eta gutxiago. Konponbide garaia da, eta ezker abertzaleak pauso batzuk eman baditu ere, Espainiako Gobernuak lehengo eskema berbera jarraitzen du. Epaiketa hauek errepresio sistema horren barruan kokatuta daude. Zubitik eraman zintuzten, eta zubitik etorri zinen. Euskal jendarteak beste garai baterako zubia igaro duela uste duzu? Bai, baina aktibazioa edo ilusioa falta dela deritzot. Jendarteak zubia igaro du, baina beste hainbat zeharkatu behar ditugu oraindik. Hauteskundeak ere gainean ditugu. Boterea alderdiz aldatuko balitz, egoera bestelakoa izango litzatekeela uste duzu? Madrilera begiratu ordez, hobe dugu herrira begiratu, eta benetan gure aldeko apustua egin. Espainiak ez digu ezer emango, hortaz, gure bidea eraiki beharko dugu. Zubian egin bezala, domekan hemen badela herri bat erakusteko aukera paregabea dugu erabakiaren aldeko bozka emanez. Etorkizunean lan politikora bueltatzeko asmorik baduzu? Militantzia nire parte da. Premia dagoen lekuan eta neure ekarpena egin ahal dudan lekuan lan politikoa egiten jarraituko dut. Ilusioz beteta eta gogotsu bueltatu naiz; izan ere, jarraitu beharreko bidea zein den inoiz baino argiago dut, baita lortuko dugula ere.