Danok Bat Pelotazale Elkarteak irabazi du Gipuzkoako zesta-punta txapelketa
Mutrikuko Danok Bat Pelotazale Elkarteak irabazi du Ezker hormako Gipuzkoako Elkarteen arteko txapelketa, 2. mailan. Zumaiari 35-24 irabazita, Ekaitz Mendizabalek eta Mikel Mantzisidorrek jantzi dute txapela. Mutrikuko taldea pozik agertu da. “Lorpen handia da guretzat. Iaz modura, aurten ere txapela lortu dugu eta”.
Gazte mailako bikote mutrikuarrak maila ona erakutsi zuen Donostiako Karmelo Balda pilotalekuan. Partida gogorra izan zen, eta kantxara urduri atera baziren ere, Zumaiako bikotea nahikoa erraz menderatzea lortu zuten.
Hasierako tantoetan nahikoa parekatuta ibili ziren aurkari biak, baina partidaren azken zatian Danok Batekoek aurrea hartu, eta horri eustea lortu zuten. Zehatz esanda, 20 tantotik aurrera partidaren kontrola hartu zuten Mendizabalek eta Mantzisidorrek, eta erraz egin zituzten azken tantoak.
Gipuzkoako Elkarteen arteko txapelketaz gain, Danok Bateko Eñaut Urreistik eta Manex Ansolak Gipuzkoako Udazkena Sariko finala jokatu dute Zumaiaren aurka, alebin kategorian.
Bikote mutrikuarrak Tolosako Beotibar pilotalekuan maila ona erakutsi bazuen ere, Zumaiako bikoteak hobeto jokatu zuen, eta bi setak aurkariek irabazi zuten. Horrenbestez, bigarren postuan amaitu dute txapelketa Danok Bateko alebinek.
Mutrikuko pala txapelketa
Bestalde, Mutrikuko pala txapelketaren finalak ere jokatu dira asteburuan. Danok Batek antolatuta, zapatuan [abenduak 19] 2. mailako eta 1. mailako finalak jokatu ziren Miruaitz frontoian.
2. mailako finalari dagokionez, Enetz eta Unai ondarrutarrek osatutako bikoteak irabazi zuen txapelketa, ezustean. Zumaiako Josuri eta Juani, txapelketako faboritoei, 30-27 irabazi zieten. Bikote irabazlea atzetik ibili bazen ere, azken bost tantoak bata bestearen atzetik eginda nagusitu zen.
1. mailan, ordea, Berriatuko Belarrik eta Landerrek [Txusen ordez jokatu zuen] jantzi zuten txapela, Soraluzeko Gallas eta Pontxiren aurka 30-22 irabazita. 20 tantora arte, parez joan ziren bi finalistak, baina Berriatuko bikoteak maila hobea erakutsi zuen.
Behin txapelketa amaituta, Danok Bateko ordezkariak pozik agertu dira txapelketak izan duen arrakastarekin. Aurten 23 bikotek parte hartu dute txapelketan, eta horietariko asko kanpoko bikoteak izan direla nabarmendu dute. “Bikoteek lehia polita erakutsi dute, eta aurten inoiz baino kanpoko bikote gehiago egon dira”.
Mantzisidor (ezkerrean) eta Mendizabal (eskuinean) txapelak jantzita eta garaikurrekin eskuan. Argazkia: Danok Bat
Udazken txapelketako lau finalistak. Argazkia: Danok Bat
Mutrikuko Pala Txapelketako 1. mailako finalistak. Argazkia: Danok Bat
