Euskal Herriko Mus Txapelketako kanporaketak jokatuko dituzte urtarrilean Lea-Artibaiko hainbat herritan
Urtero legez, abiatu dute Euskal Herriko Mus Txapelketa. Zazpi herrialdetako muslariak batzen ditu txapelketa horrek, eta herriz herrikako fasea abian da hainbat herritan azaroaz geroztik. Lea-Artibain ere, abenduan hasi ziren lehen kanporaketen faseagaz, eta hileon egingo dituzte azkenak.
Gizaburuagan, esaterako, abenduaren 26an jokatu zuten txapelketako kanporaketa, eta Ispasterren, aldiz, urtarrilaren 8an. Luis Mari Leniz eta haren semea gailendu ziren lehenengo herri horretan, eta Xabier Meabe eta haren bikotea, berriz, bigarrenean.
Munitibarren lehiatuko dute Lea-Artibaiko hurrengo kanporaketa. Zapatu honetan [urtarrilak 16] izango da hori, 17:00etan hasita, Txori tabernan. Hurrengo hitzordua Markina-Xemeinen izango dute muslariek hilaren 23an. 16:00etan, Uhagon kulturgunean. Lekeition, azkenik, hilaren 30ean elkartuko dira musean jokatzeko: 16:00etan, Guzurmendin.
Aulestin, Ondarroan eta Mendexan ere badute musean aritu eta lehiatzeko asmoa, oraindik hitzorduak noiz izango diren jakitera eman ez duten arren.
Herri horietako kanporaketetan hurrengo faserako txartela lortzen dutenek herrialdeko kanporaketa jokatu beharko dute otsailaren 20an. Bizkaikoa, esaterako, Zornotzan lehiatuko dute. Final nazionala, berriz, martxoaren 5ean izango da, lehen aldiz, Zuberoan, Urdiñarbe herrian.
Edonork parte har dezake
Euskal Herriko Mus Federaziotik gogorarazi dute edonork parte hartu dezakela txapelketan “bere herrian antolatzen den lekuan izena eman edo agertzearekin eta bikoteko 20 euro ordaintzearekin nahikoa du”, azaldu dute.
Iaz, esaterako, Euskal Herri osoko 200 herri baino gehiagotan jokatu zen txapelketako lehen kanporaketa, eta, gutxi gora behera, 4.000 pertsonek parte hartu zuten.
