Lekeitioko beteranoen eskuzko trinketeko txapelketa hasiko dute domekan
Hain zuzen, txapelketaren XI. edizioa izango da domekan hasiko dutena. Antolatzaileek jakitera eman dutenez, guztira, bost bikotek parte hartuko dute. Aste honetakoari jarraituz, domekera bilduko dira parte hartzaileak, martxoaren 13ra arte, trinketean lehiatzeko.
Lehenengo partida 09:30ean hasiko dute Lekeitioko trinketeko frontoian. Mallabiako Telleriak eta Debako Bastidak Eibarko Orbea eta Lekeitioko Arrateren aurka neurtu beharko dituzte indarrak. Lea-Artibaikoa izan da azken urteotan txapelketako irabazlea, Arroitajauregirekin batera. Azken horren falta nabarituko duen arren, eibartarra haren hutsunea betetzen saiatuko dela argi utzi dute. Dena den, trinketean esperentziarik ez duela jakinarazi dute. Telleria eta Bastida dira, bestalde, txapelketako faboritoak antolatzaileen arabera, “aurten oso forma onean baitaude”.
10:15ean hasiko dute domekako bigarren partida. Ustezko faborito horiek eguneko bigarren partida lehiatu beharko dute Debako Astigarragaren eta Lekeitioko Fosterren aurka. Txapelketako beteranoena da 61 urteko Astigarraga. Fosterrek atzeko lana eginda, aurkarien nekea aprobetxatzeko aukera izango dute, garaipena eskuratzeko.
Indarrak “oso orekatuta”
Hirugarren eta azken partida izango da 11:00etan hasiko dutena. Lekeitioko Moral eta Mendexako Laka bikotearen eta Elgoibarko Beraza eta Etxebarria bikotearen arteko norgehiagoka izango da azken hori. Indarrak “oso orekatuta” egongo dira orduan, antolatzaileen arabera. Eta urteko partida klasikoa bilakatutako hori txapelketako “politenetakoa” izango dela ziurtatu dute. “Elgoibartarrak Leniz Gatzagako txapelketa irabazia dute eta animo handiekin datoz, baina Lakak atzean aginduz gero, Moral lekeitiarra hainbat tanto eder egiteko gai izango da”, azaldu dute.
Mallabiako Telleriak eta Debako Bastidak eskuzko trinketeko txapelketako lehen partida jokatuko dute. Argazkilaria: Julian Arrate
