Sun magoak formatu handiko magia ikuskizuna eskainiko du Mutrikun
Mago gasteiztarrak domekan eskainiko du emanaldia [urtarrilak 17], Miruaitz frontoian. Emanaldia euskaraz izango da eta interektiboa izango dela jakitera eman du magoak berak. “Herritarrek ezinezko gauzak ikusi ahal izango dituzte”. Sarrerak aurretiaz daude salgai, 5 eurotan, turismo bulegoan. “Soberan geratzen diren sarrerak domekan frontoian bertan salduko dira, 17:30etik aurrera”, azaldu dute udal ordezkariek.
Domekakoa Las Vegasen (Ameriketako Estatu Batuak) eskaintzen dituzten magia ikuskizunen moduko saioa izango dela adierazi du Iñaki Ruiz de Galarretak (Sun magoa). “Nagusiei eta umeei zuzendutako ikuskizuna da; guztiek ondo pasatuko dute”.
Euskal Herrian beste inork eskaintzen ez duen moduko ikuskizuna eskainiko duela dio magoak. “Nik eskaintzen dudana ez du inork eskaintzen; hemen inoiz ez da ikusi horrelako formatuko magia ikuskizunik, are gutxiago zuzenean. Izan ere, horrelako saioak, normalean, telebistaz ikusten dituzte herritarrek. Orain, baina, zuzenean ikusi ahalko dute. David Copperfield-en mailako magoek eskaintzen dituzten ikuskizunen antzekoa izango da”.
Saioak ordu bat eta laurden iraungo duela aurreratu du magoak. Tarte horretan, argi, soinu eta efektu berezietan oinarritutako magia trikimailuak egingo dituzte. “Agertoki handi bat prestatuko dugu, magia guztiak egiteko. Eta nirekin batera, bi dantzarik ere parte hartuko dute emanaldian”.
Publikoarekin jolasean
Baina publikoa ere ikuskizunaren parte bihurtuko da. Izan ere, ikusle bat lebitatzen jarriko dutela diote. “Publikoarekin bestelako jolasak ere egingo ditugu; ikuskizuna interaktiboa da”.
Sun magoak Espainiako telebista publikoak udan egin zuen Insuperables saioan parte hartu zuen. Eta horretan, finalerdietara ailegatu zen. Horrez gain, Espainia mailako saria ere eman zioten.
Behin Mutrikun saioa eskaini eta gero, magoak eta bere taldeak Espainia osoko bira bati ekingo diote. “Herritar guztiei, ume zein nagusi, dei egiten diet domekan Mutrikura joateko eta ikuskizunaz gozatzeko”.
Emanaldia zelakoa izango den ikusi ahal dute herritarrek magoaren webgunean.
Sun magoa, magia trikimailu bat egiten.
Sun magoak eskainitako magia ikuskizun bat.
Sun magoa eta bere taldeko dantzari bat. Argazkia: Pablo Ziaurriz.
