Aurrekontuetarako 600 mila euro gutxiago dagoela ezeztatu du Lekeitioko EH Bilduk
Lekeitioko udaletxea.
Diru kopuru hori zergetatik urtean zehar jasoko denaren aurreikuspen bat dela argitu dute. “2015ean Bizkaiko Foru Aldundiak, EAJk kudeatzen duen erakundeak, diru sarreren aurreikuspen guztiz okerra egin zuen eta ondorioz, 2016an Lekeitioko Udalak 280.178 euro itzuli beharko ditu. Krisiaren hasieratik, 2008tik, 2.400.795 euro itzuli behar izan du Lekeitioko udalak”, azaldu dute.
Dirua itzuli beharraren arrazoia, datu ekonomikoak “puztuta” ematean dagoela adierazi du EH Bilduk. 2015ean udal eta diputaziorako hauteskundeak egon direla gogora ekarri dute, eta “EAJran kudeaketa onaren ondorioz krisia gainditzen ari garenaren irudia zabaldu nahian” ibili dira jeltzaleak EH Bilduren ustez. “Benetakoak diren datuak baino hobeak eman dituzte, prekarizazioa eta zerbitzu sozialen murrizketak zuritzeko asmoz”.
Egoera hobean ikusten ditu, bestalde, Gipuzkoako udalak. “EH Bilduren eskutan zegoen Foru Aldundiak egindako kudeaketa zorrotzari eta irizpide sozialagoei esker, dirua itzuliko bait die Gipuzkoako udalei. Bizkaiko Foru Aldundia ez da horretarako gai izan, izan ere, PNVk, aberastasuna eta fortuna handiak babestea du helburu. PNVren kudeaketa eskasaren beste adibide bat”, nabarmendu dute.
EH Bilduren kalkuluen arabera, EAJren “kudeaketa txarraren erruz” itzuli behar den dirua kontuan izanda, 2016an 118.394 euro gutxiago izango ditu Lekeitioko Udalak, eta egoera horreri aurre egiteko bi bide daudela azpimarratu dute: EH Bildurena eta EAJrena. “Aurreko legealdian diru sarrerak txikiagoak izan arren, udal zerbitzuei eta beharginen baldintzei eutsi egin genien. Berauek ziren lehentasun. Ondorioz, inbertsioak egitea, urtean sartu zitezkeen diruen menpe geratzen zen: garajeen salmentak, diru-laguntzak,…”.
EAJk berriz, “asfaltoa eta itxurakeria” lehenestu dituela diote. “Horrexegatik batzordeetan murrizketak planteatzen dabil. Eta beharginen baldintzetan berdin: igerilekuko soroslea esate baterako”, azaldu du koalizioak.
