Gasteizko hilketa matxista salatzeko elkarretaratzeak egingo dira Lea-Artibain

Lea-Artibai eta Mutriku

2016/01/27

Elkarretaratzeak bihar [urtarrilak 28] egingo dira. Markina-Xemeinen, esaterako, elkarretaratzea udalak deitu du eta 20:00etan udaletxe aurrean batzeko deia egin die herritarrei. Ondarroan, ere bihar, egingo da, 19:00etan, Alamedan. Deialdia udalak egin du, Munduko Emakumeen Martxak egindako deialdiagaz bat eginez. Lekeition, ere biharko jarri du hitzordua Potxuak Martxan taldeak; 19:00etan, Eskolapean.

Markina-Xemeingo Udalak udaletxean ipini duen pankarta.

Berriatuan, emakume taldeak deituta, elkarretaratzea 18:30ean egingo da, bihar, udaletxe aurrean. Horrez gain, udalak adierazpen instituzionala ere egin du. “Gasteizkoa indarkeria matxistaren ondorioz aurtengo lehen hilketa da, Euskal Herrian. Indarkeria matxista emakumeen eguneroko ogia da, gehienetan ezkutuan geratzen dena, oraindik ere menpekotasun egoera batean bizi baikara”. Emakumeenganako indarkeria gizartean errotu eta hazten dela gaineratu dute. “Beraz, arazoa kolektiboa izanda, herritarron ardura da indarkeria matxistari aurre egitea”.

Horrez gain, Berriatuko Udalak emakumeen kontrako indarkeria behin betiko amaitu arte lan egingo duela jakitera eman du. ” Emakumeek jasaten duten zapalkuntzari aurre egiteko konpromisoan berresten dugu”.

Beste alde batetik, atzo, Mutrikun, elkarretaratzea egin zuten, erasoa salatzeko. [DEIALDIAK EGUNERATZEN JOANGO GARA]