Kantauri Surf Ligako laugarren saioa jokatuko da Karraspion
Euska Herriko Surf federazioak antolatzen duen Kantauri Surf Ligako laugarren saioa lehiatuko dute asteburuan Karraspion. Artzabal-Ogoñope Lea-Artibaiko taldea Zarautzko Surf Elkartearen kontra neurtuko da asteburu honetan. 15:00etan hasiko da proba.
Bost surflari aterako dira uretara eta bakoitzak hiru olatu hartuko ditu jarraian. Ondoren lycra aldatuko dute eta partaideak txandakatu egingo dira.
Urtarrilaren 17an hasi zen taldekako modalitatean egiten den surf txapelketa eta Artzabal Surf Elkartea hirugarrenez ari da parte hartzen. Iaz bezala Ogoñope surf elkarteko lagunekin batera hartuko dute parte Artzabal-Ogoñope Surf Team izenagaz.
Hasiera batean Karraspion (Mendexa) egingo dituzte etxean jokatuko dituzten saioak, baina olatu nahikorik ez denean Ibarrangeluko Laga hondartzan izango da lehia. Horrela gertatu zitzaien Karraspion jokatzekoak ziren ligako 2.en saioan.Artzabal-Ogoñope Surf Teameko surflariek garaipena lortu zuten Zurriola Surf Taldearen kontra (Donostia). Karraspion olaturik ez zegoenez Lagako (Ibarrangelu) hondartzan jokatu zuten saioan AOST-k 39 eta Zurriolak 25 puntu lortu zituzten.
Ligako 3. jardunaldia, berriz, Karraspion jokatu zuten Zurrunbilo (Deba) Surf Elkarteko kideen kontra. Deban egin behar zuten saioa, baina olatu handien ondorioz Karraspion batu ziren talde biak. Emaitza debatarren aldekoa izan zen.
Sei talde ligan
Sei talde ari dira jokatzen aurtengo Kantauri Surf Liga: Getxo Surf Taldea, Bakio Surf Taldea, Debako Zurrunbilo Surf Taldea, Zarautzko Surf Elkartea, Zurriola Surf Eskola, Patris Surf Elkartea eta Artzabal Ogoñope Surf Team.
Artzabal Ogoñope eta Zurrunbilo taldeetako surfistak. Argazkia: Artzabal Surf Elkartea
