Lea-Artibaiko Dzaust!, Lorea eta Ironia taldeak Gazte Danbadako sariketan
2016ko Gazte Danbadako oholtza gainean jotzeko sariketan parte hartzen ari dira Lea-Artibaiko Dzaust! taldea, Ziortza-Bolibarko Lorea bakarlaria eta Ironia talde ondarrutarra.
Musika panorama astindu eta sortzaile gazteak ikusarazi asmoz, Oholtza gainean bakerik ez ekimena abiarazi dute Aitzina, Ernai, Haizebazterrak eta Topatuk elkarlanean. Eszena gazte, berritzaile eta eraldatzailea egon badagoela erakustea dute helburu. Parte hartzen duten talde guztiek izango dute Gazte Danbadan jotzeko aukera. Horietatik hiru taldek, gainera, zuzeneko hiru abesti grabatzeko zortea ere izango dute.
Talde horiek aukeratzeko sariketa bat jarri dute abian. Taldeei bozka emateko bozkatu.topatu.eus webgunean sartu behar da eta taldea aukeratu.
- Lehen 15 taldeek gune handi batean kontzertu osoa eskaintzeko aukera izango dute, 5 taldek gau bakoitzeko.
- Gainerako guztiek herrian zehar jarriko ditugun gune eta eszenatoki desberdinetan joko dute.
- Hautatutako lehen 3 taldeek zuzeneko 3 abesti grabatzeko aukera izango dute Haizebazterrak eta Topaturen eskutik. Abesti horiekin zuzeneko ikus-entzunezko bat sortuko dugu, eta Gazte Danbada aurretik publikatuko ditugu hiruak. Grabaketak (soinua eta irudia) otsailaren 26tik 28ra bitarte egingo ditugu Zaldibian.
Dzaust taldea: Amaia Ezenarro, Aitor Elu, Mikel Astola, Haitz Etxebarria, Jon Etxebarria, Jon Lekube eta Garikoitz Salcedo. Argazkia: Dzaust
