Kopla zahar, musika eta makila hotsak entzun dira asteburuan Lea-Artibain eta Mutrikun
Santa Ageda bezpera hilaren 4an izan bazen ere, ohitura zaharrari eutsiz,asteburuan ere irten dira koplariak Santa Ageda abestera. Bertsolari eta musikariekin lagunduta aterik ate eta baserriz baserri ibili dira kantuan.
Goikolau elkarteak antolatuta irten zuten Santa Eskean, zapatuan, Berriatuan. 10:00etatik 13:00etara, talde bitan banatuta, 25 bat lagun Milloi auzoan barrena koplak abesten ibili ziren etxerik etxe. Iñigo eta Joseba Goienola, Imanol Aldazabal, Julen Soraluze eta Jose Luis Basterretxea Altzalei bertsolariek, trikitilariak eta pandero joleak lagunduta ibili ziren giroa alaitzen. Arratsaldean, bidelagun gehiagogaz, herrigunean aritu ziren eskean.
Auzorik auzo
Zapatu osoan egin zuten kantuan Amorotoko Arta Nagusi Dantza Taldeko ume, nagusi eta gurasoek ere, akordeoijole, biolin-jotzaile eta trikitilariek lagunduta. 65 lagun inguru batu ziren goizean Elexalde auzoa kopla eta doinuz girotzeko. Bazkalorduan tarte bat eginda, berriz ere ekin zioten kantuari beste auzoak ere alaitzeko asmoz. Urrutia eta Odiagan ibilita, Oletan amaitu zuten kantaldia dantza taldeko nagusiek. «Nekatuta, baina gustora» geratu ziren. Bildutako dirua, dantza taldearen gastuetarako erabiliko dute.
Lau talde aritu dira kantuan Mutrikun aurten, eta batu duten diru guztia Kalaputxi aldizkariarentzako izango da. Imanol Lekunberri, Iñigo Arrizabalaga, Angel Mari Peñagarikano, Laxaro Astigarraga, Jexux Mari Irazu, Orlando Arreitunandia, Iñaki Apalategi eta Xabi Astigarraga aritu ziren koplari.
Ziortza-Bolibarren ere zapatuan irten ziren kalera.
Berriatuarrak santa eskean. Argazkia: Berriatuko Udala
Amorotoko Arta Nagusi Dantza Taldeko ume, nagusi eta gurasoak Elexalde auzoan abestu zuten zapatu goizean. Argazkia: Arta Nagusi Dantza Taldea
Santa Eskean, Mutrikun. Argazkia: Arantza Ugarte
