Markina-Xemeingo Udalak ortu publiko gehiago jarriko ditu herritarren eskura
Barroetako ortuetara herritar gehiago hurreratzeko helburuagaz, ortu publikoen hirugarren fasea jarriko du martxan Markina-Xemeingo Udalak. Aurtengo urtean emango diote hasiera hirugarren aldiari eta interesatuta dauden herritar guztiek izango dute parte hartzeko aukera. Izena emateko baldintza bakarra Markina-Xemeinen erroldatuta egotea eta beste lursail propio edo publikorik ez edukitzea da.
“Ortuak norberak kontsumitzeko ortuariak ereiteko erabiliko dira. Horregaitik, debekatuta dago ortu horietako produktuak saltzea”, azaldu du udalak. Ortua izateko aukera lortzen duen herritarrak bost urtez edukiko du ortu hori erabiltzeko aukera.
Ortu bat edukitzeko interesa duten herritarrek martxoaren 4rako eman beharko dute izena, udaletxeko harreran.
Erantzun ona
Barroetako ortu publikoak.
Markina-Xemeingo Udalak 2012 urtean ipini zuen martxan Barroetako ortu publikoen proiektua. Ortuak hainbat helbururekin jarri ziren martxan: kalitatezko produktuak lortzeko, pertsonen arteko harremanak sendotzeko, elkarlana sustatzeko, auzolana bultzatzeko, herritarren aisirako, eta orokorrean, herritarren bizi kalitatea hobetzeko.
Egitasmoak hasieratik izan du herritarren onespena. Beraz, ortuek edukitako arrakasta ikusita, bigarren fasea jarri zuen martxan udalak. Eta hor ere arrakasta eduki ostean dator hirugarren fasea.
