Ondarroako inauterietako kalejira bertan behera geratu da, eguraldi txarragatik
Ondarroako Udalak jakitera eman duenez, bihar [otsailak 9] goizean egitekoa zen inauterietako kalejira ez da egingo, eguraldi txarraren iragarpenagatik.
Euskalmet Euskal Metereologia Agentziak iragarri duenez, hain zuzen ere, bihar haize zakarra eta euri zaparrada handiak espero dira. Batez ere, eguerdi partean, kantauri isurialdean zaparrada mardulak iragarrita daude.
Eguraldi txarra dela eta, gainera, Mikel Egiluz DJ animatzailearen emanaldia lekuz aldatuko dela ere aurreratu du udalak. Itsasaurre plazan egin ordez, kiroldegian egingo da ikuskizuna, ordu berean (12:00etan).
Bestalde, iluntzeko ekimenak mantendu egingo direla adierazi dute Kresala Kultur Elkarteko eta Artelan Elkarteko kideek. Akularen enterrua, esate baterako, azken 27 urteotan ez da behin ere bertan behera gelditu, eta bihar ere egingo dela aurreratu dute antolatzaileek.
Azkenik, udalak antolatutako inauterietako tabernen eta denden apainketa lehiaketa Gaztedi tabernak eta Zuberoa okindegiak irabazi dute. Irabazleek 600 euro jasoko dituzte. Horrez gain, 100 euroko kontsolamendu sariak Beikozinik eta Gandiaga jantzi dendak jaso dituzte.
Herritarrak zapatuko kalejiran
