Beltran de Herediaren Ondarroako agerraldia "propaganda hutsa" izan dela salatu dute sindikatuek
Erne ertzainen sindikatuak eta ELA sindikatuetako ordezkariek protesta egin eta euren errealitatea ezagutara emateko agerraldia egin dute gaur [otsailak 17], Ondarroako ertzain etxearen aurrean. Bi sindikatuek, Jaurlaritzak Ertzaintzan egin beharreko inbertsioak murriztu dituela salatu dute, aho batez. Baina, aldi berean, dirutza balio duen lan bat egiteko baliabideak badituela esan dute. Izan ere, Estefania Beltran de Herediak 2009an Ondarroako ertzain etxearen inguruan eraikitako horma suntsitu egingo dela esan du, “zerbitzua herritarrengana hurbiltzeko”.
Sindikatuen esanetan, azkenaldian Ertzaintzaren egungo egoera zein den azaltzen eta salatzen ari dira. “Ertzaintzak arazo batzuk ditu, eta agerraldi honetan ez da arazo horietaz berba egiten”.
Alde batetik, urte honetarako Jaurlaritzak egindako planak zerbitzuaren zentralizazioa duela oinarri azaldu dute. “Komisaldegietan langile gutxiago dauden bitartean, zentralizatutako beste unitate batzuetan gehitu egin dituzte. Beraz, zerbitzua ez da herritarrengandik hurbiltzen, urruntzen baino. Jaurlaritzak gertutasuna esaten duenean, esan nahi du bi ertzain patruila egiten oinez ibiltzea. Eta ez da horrela”, esan du Tomas Rodriguez ELAren ordezkariak.
Zertzibua hurbilagoa izateko, herrietako komisaldegi txikiak, itxi ordez, zabaldu egin beharko liratekela esan du Roberto Seijo Erneko bozemaileak. “Zornotzakoa, Lekeitiokoa… dira horren adibide. Horiek guztiak itxita daude. Jaurlaritza gehiagotan ari da ertzain etxeak isten zabaltzen baino”.
Gipuzkoan, esaterako, zeuden komisaldegi txiki guztiak desagerrarazi izana leporatu dio Rodriguezek sailburuari. “Guztira 300 komisaldegi egon beharko lirateke, eta 150 daude”.
Beste alde batetik, Ertzaintzak zaharkitutako ibilgailuak dituztela agertu dute. “Beharra dago dirua horretan gastatzeko, ez propaganda egiteko agerraldiak egiten”.
Ikerketa alorrean ere inbertsiorik ez dela egiten gaineratu dute. “Behin eta berriz ari gara murrizketa horien inguruko salaketak egiten”.
ERNE eta ELAren Ondarroako protesta
Ertzainak protestan, Ondarroako ertzain etxearen aurrean.
