Munitibarko herriko tabernari izena jartzeko lehiaketa jarri dute martxan
Munitibarko herriko taberna taberna bat baino gehiago izango da aurki, aterpetxea egiteko lanak hasiak baitira. Horri bizitasuna ematea beharrezkoa ikusten dute, eta, horretarako, berezko izen bat jartzeko erabakia hartu dute. Aurrerantzean zein izen izango duen, baina, herritarren esku egongo da; izan ere, lehiaketa bat jarri dute martxan.
Munitibartarrek dagoeneko herriko tabernaren izena aukeratu dezakete, tabernan jarritako postontzian beraien ideia zehazten duen papera sartuta. Otsailaren 29a izango dute horretarako azken eguna, eta herritar bakoitzak izen bat baino gehiago emateko aukera edukiko du.
Parte hartzaileen artean hiru izen aukeratuko dituzte, eta horien artean, bi pertsonentzako otordu bat zozkatuko dute. Hori martxoaren 4an egingo dute.
