Aiora Agirregomezkorta markinarrak Espainiako Kros Txapelketan parte hartuko du
Tximista atletismo taldeko gaztea da Agirregomezkorta, eta txapelketa horretan lehiatzeko Burgosera joango da asteburuan, Euskadiko selekzioagaz.
Urtarrilaren 28an Donostiako hipodromoan lortu zuen Espainiako txapelketara joateko txartela. Egun horretan, Euskadiko txapelketa izan zen jokoan, eta markinarrak hirugarren postua eskuratu zuen, Tolosako eta Santurtziko nesken atzetik.
Sei izango dira kadete mailan Euskadiko selekzioak Espainiako txapelketara eramango dituen neskak, eta horien artean izango da Tximistakoa ere.
Agirregomezkortak iragarritako hotzari eta lokatzari egin beharko dio aurre asteburuan Burgosko landetan, eta distantziari dagokionez, hiru kilometroko ibilbidea izango du aurretik.
Tximista taldetik azaldu dutenez, “neguko denboraldi bikaina egiten ari den atleta gaztea da markinarra”. Hala, denboraldia horrela bukatzea espero du taldeak, eta, horretarako, zorte ona opa diote.
Aiora Agirregomezkortak hirugarren egin zuen Euskadiko Kros Txapelketan
