Lekeitioko Beteranoen Trinkete Txapelketako finalaurrekoak jokatuko dira asteburuan
Betaranoen Esku Pilota Txapelketa azkenak ematen hasi da. Datorren domekan jokatuko dira Lekeitioko trinketean, finalaurreko partidak eta emozioak amaierara arte iraungo duela ziur dago.
10:00etan hasita, lau bikote neurtuko dira, finalerako pasea lortu nahian. Finalaurrekoak partida bira jokatuko dira eta finalera heltzeko, biak irabazi beharra dago. Bana gelditzen badira, berdinketa hausteko partida jokatuko da.
10:00etan, Telleria eta Bastida (Mallabia-Deba) eta Moral eta Lakaren (Lekeitio-Mendexa) arteko norgehiagoka burutuko da. Ligaxkan partida estua jokatu zuten, eta Laka hankako lesiotik sendatzen bada, partida polita izan likete eta txapelketako faboritoak zailtasunak izan ditzakete irabazteko.
Bigarren partida, 10:45ean hasiko dena, Jaunarena eta Foster (Garzaron-Lekeitio) eta Orbea eta Arrateren (Eibar-Lekeitio) artekoa izango da. Jaunarena nafarra aurrean bere efektuak erabiltzen eta sakeari etekinak ateratzen saiatuko da. Ligaxkan gaixo egon zen eta bere ordez Astigarragak jokatu zuen, beraz, Orbeak, aurkari ezezaguna izango du aurrean. Atze aldean Foster eta Arrate parekatuta egon daitezke. Horrela, partida interesgarria izatea espero da.
Finalak, martxoaren 13an izango dira.
Ligaxkaren amaiera
Joan den astelehenean eta domekan, jokatu ziren ligaxkako azken partidak. Domekan Orbea eta Arrate (Eibar/Lekeitio) eta Moral eta Astigarragaren (Lekeitio/Deba) arteko norgehoagoka jokatu zen. Orbea eta Arrate izan ziren nagusi 30 eta 18 irabazita.
Galtzaileak ondo hasi ziren, eta Astigarragan maixotasunagaz sarera bideratu zituzten hainbat pilota. Markagailuan 14 eta 4 irabazten jarri ziren. Moral aurrean agintzen eta tanto bikainak egiten. Baina, Arrateren laguntzagaz, Orbea bere jokoa egiten hasi zen eta sakeaz baliatuz 15 eta 15 era berdintzea lortu zuten. Hortik aurrera, jaun eta jabe izan ziren. Hainbat pilota txokora bidalita edo eskumako hormaz bilatuz, min handia egin zieten Moral eta Astigarragari. Azkenean, galtzaileek irabazita zutela uste zuten partida maldan gora jarri zitzaien.
Asteleheneko partida berdintsuago joan zen. Moral eta Laka (Lekeitio/Mendexa) eta Beraza eta Etxebarria elgoibartarrak neurtu ziren. 30 eta 28 irabazi zuten lehenengoek.
Bikote biak aukerak zituzten azken aurreetarako sailkatzeko, baina horretarako partida irabazi behar zen. Nahiz eta Laka domekan lepamin bategaz egon, eta bere lekua Astigarraga beteranoak hartu (61 urtekoak), oraingorako prestatu zen, eta ondo, gainera.
Partida, erritmo handiagaz hasi zen, eta elgoibartarrak nahiz eta 5 tantora berdinduta egon, apurka-apurka abantaila hartzen joan ziren. Ia partida osoan 5 tantoko aldeagaz irabazten joan ziren, eta 25 eta 20 ere bai. Laka hankan min hartuta zegoen 6. tantotik , baina ez zuen amorerik eman, eta kantxa ondo zainduz eta Moralii argi aginduz, partida aurrera atera zuten. Etxebarriak eskuak minduta zituen, eta fisikoki ondo erantzun arren, ez zen gai pilota Moralen ingurutik kentzeko, eta honek ez zion barkatu.
28ra berdinduta zeudenean, Berazak dejada polit bat txapara bota zuen, eta hor egon zen norgehiagokaren gakoa. Ordu bete ondoren eta partida bikainagaz gozatuta, oso pozik geratu ziren bi bikoteak, nahiz eta elgoibartarrek, pena handiz, txapelketari agur esan behar.
Beraza errematzeko prest joan den asteburuko partidan. Argazkia: Julian Arrate
Beraza, Etxebarria, Laka eta Moral partida jokatu aurretik. Argazkia: Julian Arrate
