Euskal Herriko kluben arteko txapelketako finaletan izango dira bertoko taldeak
Pilotazaleek intentsitate handiko asteburua bizitzeko aukera izango dute, Ezker Pareteko Euskal Herriko Kluben arteko Txapelketako finalei esker.
Markina-Xemeingo eskupilota taldeko jokalariek, esate baterako, Azkoitian, zapatuan [martxoak 5] jokatuko den finalean parte hartuko dute. Bertan, ligako nagusien arteko eta 22 urtez azpikoen partidak jokatuko dira, 18:30etik aurrera. Azken kategoria horretan, hain zuzen ere, jokatuko dute finala Markina-Xemeingo Arrizabalagak eta Arrasatek. Txapela janzteko, ordea, LAZPKE-ko Zubizarreta eta Garmendia gainditu beharko dute.
Bestalde, Mutriku Miruaitz frontoia zesta-puntako interes gune bihurtuko da bihar [martxoak 4], 19:00etatik aurrera. Gazte mailan Mutrikuko Danok Bateko Ekaitz Mendizabal Goixerri eta Mikel Manzisidor, Gasteizko Jai Alai taldeko Aaron eta Lazarrabali irabazten ahaleginduko dira. Kadete mailan aldiz, Markina-Xemeingo Kepak eta Danelek, Zumaiako Agirreren eta Lopezen aurka jokatuko dute.
Zapatuan, berriz, Markina-Xemeingo Uni frontoian jokatuko dira zesta-puntako nagusien mailako bi kategorietako norgehiagokak, 19:00etatik aurrera. Nagusien ohorezko mailan, esaterako, Berriatuko Antxon eta Ubilla, Donostiako Jai Alaiko Alberro anaien aurka jokatuko dute. Nagusien mailan, bestalde, Danok Bateko Goenaga eta Andonegi, Berriatuko Retoren eta Txominen aurka ariko dira, nor baino nor.
Danok Batekoak, Iparraldeko txapelketan ere bai
Euskal Herriko kluben arteko finalak jokatzeaz gain, Danok Batek puntista gazteek Iparraldeko neguko txapelketako finala ere jokatuko dute zapatuan, 16:30ean, Biarritzeko Euskal Jai Berri pilotalekuan. “Txapelketan parte hartzeko gonbidapena egin ziguten, eta beste talde batzuen aurka lehiatzeko gogoa ere bagenuenez, parte hartzea erabaki dugu. Txapelketa horretan parte hartu dugun lehen aldia da, eta oso gustura geratu gara esperientziarekin”.
Danok Bateko Ekaitz Mendizabal eta Mikel Manzisidorrek, Donibane Lohitzuneko bikotearen aurka jardungo du, kadete mailan.
Mutrikuko Miruaitz frontoia
Orain bi urte Markina-Xemeinen jokatutako finalak
