Udalkutxa Udaleko Finantziazio Funtsaren
Diputazioari itzuli behar dion
436.287 euroak baldintzatu dute Lekeitioko Udalaren 2016ko aurrekontua. Gastu hori kontuan hartuta, aurrekontua egokitu behar izan dutela azaldu du EAJren udal taldeak. Hala ere, aurtengo aurrekontuak iazkoen nahikoa antzekoak izango dira, beraz, 8 milioi euroko aurrekontua edukiko dute Lekeition aurten ere.
Atzo [martxoak 2] iluntzeko osoko bilkuran
onartu ziren 2016rako aurrekontuak EAJren aldeko botoekin. Oposizioak aurka bozkatu zuen, eta Gobernuak aurrekontuak egiterakoan erabilitako prozesua salatu zuen EH Bilduk, beste batzuren artean, batzordeetan eztabaidarako aukerarik ez dela egon azpimarratuz. “Partidaz partida ekarpenak egin ditugu, baina diru falta aitzaki, bat ere ez dute onartu”. Aurreko urteekin alderatuta eta
zor gutxiago egonik,
aurten diru gehiago dagoela aitatu du EH Bilduk, “nahiz eta Udalkutxara dirua itzuli behar den”. Beraz, lehentasunak direla kontua nabarmendu zuten. “Aurrekontuak ez dira egokiak gure ustez, herritarren beharrizanetatik kanpo daude”.
Udalkutxara
dirua itzuli beharra ere,
EAJren ardura dela esan zuen EH Bilduk. “Hirugarren urtez Gipuzkoako udalek diru gehiago izango dute, eta Bizkaikoek, aldiz, gutxiago. Politika fiskala aldatzeko erantzukizuna du EAJk”.
Koldo Goitia alkatea, aurrekontuen aurkezpena egiten.
Teilatuen konponketa
Aurrekontuen gastuaren ia
%40 pertsonal gastuetara bideratuko du udalak. Horrez gain, 2016ko aurrekontuetan, hezkuntzak, gizarte zerbitzuek eta herriaren funtzionamendurako oinarrizkoak diren zerbitzuak izango dutela lehentasuna azaldu du EAJren udal gobernuak. Horrela, Hezkuntzara ia 380 mila euro bideratuko ditu udalak, nahiz eta, kontuak egokitzerakoan
ikastetxeentzat, guztira,
7.000 euro gutxiago egongo diren.
Gizarte Zerbitzuen harrera indartzeko 83.875 euro aurreikusi dituzte, bestalde. Hala ere, udalak Gizarte Larrialdietarako gehitzen duten partida murriztu dute. “Orain arte gastatu dena ikusi dugu, eta horretara egokitu da kopurua. Dena dela, Gizarte Zerbitzuek lehentasuna dute guretzat, eta, beraz, beharrizana egonez gero, diru gehiago bideratuko genuke horretara”, azaldu dute. Udal ordezkariek jakitera eman dutenez, hitzarmen bat adostuko dute egoitzagaz, sarreraren bat egin behar denean eman beharreko pausoak zehazteko.
Inbertsioak aurrekontuaren %10,71: Udal eraikinetako teilatuak egoera kaxkarrean aurkitu dituztela ere esan dute, eta, ondorioz, horiek konpontzea ere lehentasunezkoa izango dela azaldu dute
Herri lanak, eraikinen mantenimenduak eta ingurumenak ere aurrekontuetako kopuru handi bat eramango dute. Horretara,
556.693 euro bideratuko dituzte.
Kirol eta kultur ekintzak sustatzera ere bideratuko du udalak aurrekontuetako kopuru handi bat. Kirolaren atalera
594.431 euro bideratuko dituzte, eta kulturara, 448.147 euro. Euskera eta Berdintasuna lantzeko, berriz, 58.718 euro eta 22.000 euro aurreikusi dituzte, hurrenez hurren.
Inbertsioak aurrekontuaren %10, 71 izango dira. Udal eraikinetako teilatuak egoera kaxkarrean aurkitu dituztela ere esan dute, eta, ondorioz, horiek konpontzea ere lehentasunezkoa izango dela azaldu dute. Horretara bideratuko dute, beraz, inbertsioen ataleko kopuru handi bat.
Abaroa jauregiko teilatua, Isuntza Arraun elkartearena, kiroldegikoa eta Gaztegunekoa dira aurtengo urtean konpondu nahi dituztenak.
“Abaroa jauregiko teilatuaren bigarren fasea burutuko da aurten. Erreteila eginda azpiko arotzeria eta leihoak egitea ezinbestekoa da, berriz ere urik ez sartzeko”, azaldu dute. Guztira,
74.739 euroko aurrekontua izango du jauregiaren teilatuaren zaharberritze lanen bigarren faseak. Abaroa konpontzeko, baina, Eusko Jaurlaritzaren eta Bizkaiko Foru Aldundiaren diru laguntzak lortu dituzte.
Kiroldegiko teilatuari dagokionez, segurtasun kontu bat ere badela aitatu du EAJk. “Boleibol taldekoak kantxa ezin erabilita egon dira, eta kanpoko erretenak egoera txarrean daude. Gainera, pasealekua bertatik igaroko da, eta segurtasuna ziurtatu beharra dago”.
Kirol instalakuntzak konpontzeko 40.000 euroko aurrekontua aurreikusi dute.
Iazko aurrekontuetatik 100.000 euroko superabita dute; egitasmo edo beharrizan berriak egonez gero, kopuru horretara joko dute
Gazteguneko teilatuari dagokionez, bestalde, nahiz-eta aurrekontuetatik kanpo geratu, aurten egitekoak direla jakitera eman dute. “Hala ere, zortzi urte besterik ez dituen eraikin batean urritasunak nondik datozen eta noiz hasi ziren aztertuko dugu, eta erantzukizunak eskatu behar diren ikusiko da”.
Teilatuez gain,
SanJuan eta Santa Katalina arteko pasealekua ordaintzeko (
465.907 euro), San Andres auzoa barrizteko proiektua egiteko (20.000 euro),
Herri Antolamenturako Plan Orokorra egiteko (
40.000 euro),
Garraitz irla eta Santa Katalina barneratuko dituen paisaia ekintza plan bat osatzeko (
21.620 euro) eta Hirigune egitasmoaren baitan sartzen den
azoka gunea hobetzeko (
29.397 euro) eta
Eskola gorriko leihoak aldatzeko (
60.000 euro) erabiliko dira batez ere, inbertsioen ataleko 866.663 euroak.
Bestalde,
iazko aurrekontuetatik 100.000 euroko superabita dutela jakitera eman du agintean dagoen udal gobernuak, eta, beraz, egitasmo edo beharrizan berriak egonez gero, kopuru horretara joko dute.