II. Arri-Botx Bertso Paper Lehiaketan parte hartzeko epea zabaldu dute Ondarroan
Ondarroako Bertsutan bertso eskolak eta Bizkaiko Bertsozale Elkarteak antolatuta, Ondarroan bizi edo Ondarroan ikasten ari diren 18 urtetik beherako herritarrek parte hartu ahal dute bertso paper lehiaketa. Apirilaren 12ra arte aurkeztu ahal dira lanak.
Neurria eta gaia libreak izango direla jakitera eman dute antolatzaileek. Hori bai, aurkezten diren bertsoak beste inon argitaratu gabeak eta beste inongo lehiaketan saritu gabeak izan beharko dute.
Parte hartzaileen artean bi maila bereiztuko dira: 12 urtera artekoak eta 13-18 urte bitartekoak.
Zelan eta non aurkeztu
Lanak DIN-A4 tamainako orrietan aurkeztu beharko dira, alde bakarrean, ordenagailuz idatzita eta Times New Roman (12 puntuko letra tamaina) letra estiloa erabilita. Lerrotik lerrora, gainera, 1,5eko tartea utzi beharko da.
1. mailan sartzen diren parte hartzaileen kasuan, lanak zuzenean bertsolaritzako irakasleak jasoko ditu dagokion ikastetxean.
2. mailako lanen kasuan, ostera, Ondarroa BHI-ko idazkaritzan aurkeztu beharko dira, ondoko pautak errespetatuz: gutunazal handi batean sartuta, non ikaslearen ezizena, lanaren izenburua eta 2.maila agertu beharko diren, azalean; barruan beste gutunazal txikiago bat sartuko da, parte hartzailearen izen eta abizenekin, ikastetxearen izena, jaiotza daata, helbidea, telefonoa eta posta elektronikoa.
Ondarroako Bertsutan bertso eskolako kideak arduratuko dira lanak epaitzeaz.
Sariak
- 1. mailan: ikastetxe eta talde bakoitzeko sari bat egongo da eta baita sari orokor bat ere, lan guztien artean onena saritzeko.
- 2. mailan: lehen eta bigarren sariak emango dira.
