Egunotan ia 400 tona berdel lehorreratu dituzte Ondarroan
Martitzenean [martxoak 15] denboraldiko lehen berdelak Ondarroan porturatu zituztenetik, berdel asko saldu da Kalare Deuna kofradiako bentan. Kofradiako arduradunek igorritako datuen arabera, azken hiru egunotan, 388.000 kilo berdel lehorreratu dituzte baxurako arrantzaleek.
Berdeletako kuota nahikoa txikia denez, aurten kanpaina oso motza izango dela aurreikusten dute kofradiako arduradunek. “Horrela jarraitzen baldin badu, laster amaituko dute kupoa”.
Gaur [martxoak 17], esate baterako, 22 bat ontzik 150 tona inguru lehorreratu dituzte, kanpaina hasi zenetik kopururik handiena. Kostatik oso hurre arrantzatu dute arraina, kostalde osoan; hortik gehiena, Bermeo kabran eta Getaria parean harrapatu dute.
Tamainari dagokionez, berdel handia porturatu dute egunotan; kiloan 2-4 ale bitartekoa. Prezio aldetik, nahikoa merke saldu da gaur berdela; kiloa, bataz beste, 66 zentimoan. Freskorako saldu dena garestiago saldu da, kiloa 75 zentimo bueltan, eta izozteko, ostera, 57 zentimo inguruan saldu da.
Atzo [martxoak 16], ostera, berdel gutxiago lehorreratu zuten; 98.ooo kilo. Prezio aldetik, 73 zentimoan saldu zen kiloa. Kaxetan etorri zirenak 85 zentimo inguruan saldu ziren, eta tinetan etorri zirenak, aldiz, 65 zentimo inguruan.
Atzo, bestalde, antxoa oso merke saldu zen bentan. Tamaina aldetik, arraina oso txikia izan zen, kiloko 70-80 ale ingurukoa, eta horrenbestez, salmenta prezioa amildu egin zen; bataz beste, 98 zentimoan saldu zen kiloa. “Beste portu batzuetan, gehiago egon zen, eta tamaina aldetik txikia zenez, merke saldu zen”.
Asteko salmenta:
‘Nuevo Aires Ason’ ontziko arrantzaleak berdela deskargatzen, gaur goizean
Baxurako arrantzaleak sareak josten, gaur goizean. Alboan, berdela tinetan sartuta ageri da
- MARTITZENA [martxoak 15]
- Berdela. 140.000 kilo; 76 zentimo, bataz beste.
- Betandia. 2.800 kilo; 79 zentimo, bataz beste.
- Boba. 38.900 kilo; 71 zentimo, bataz beste.
- Lentoia. 4.300 kilo; 1,97 euro, bataz beste.
- Txitxarro zuria. 3.200 kilo; 3,31 euro, bataz beste.
- EGUAZTENA [martxoak 16]
- Antxoa. 18.000 kilo; 98 zentimo, bataz beste.
- Berdela. 98.000 kilo; 73 zentimo, bataz beste.
- Boba. 3.100 kilo; 69 zentimo, bataz beste.
- EGUENA [martxoak 17]
- Berdela. 150.000 kilo; 69 zentimo, bataz beste.
