Gipuzkoak eta Bizkaiak elkarren aurka jokatuko dute GRAVNI-n
GRAVNI federazioen arteko txapelketako bigarren jardunaldian Bizkaia eta Gipuzkoako federazioek indarrak neurtuko dituzte. Zesta-puntan, hain zuzen ere, etzi, 10:30ean jokatuko da partida, Mutrikuko Miruaitz frontoian.
Gipuzkoako taldearentzat bigarren jardunaldia baldin bada ere, Bizkaikoentzako lehenengoa izango dela nabarmendu du Roberto Lekue Bizkaiko zesta-punta hautatzaileak. Bi federazioetako hautatzaileek nabarmendu dutenez, gazte, 22 urtez azpiko eta nagusi mailan jokatuko diren partidak oso lehiatuak izango dira.
Gazte mailako partidari dagokionez, Lea-Artibai eta Mutrikuko zesta-punta jokalariek aurrez aurre jokatuko dute neurketan. Bizkaitik Markina-Xemeingo Gotzon Mandiolak eta Berriatuko Jon Ruizek osatutako bikoteak, Mutrikuko Ekaitz Mendizabal eta Mikel Manzisidorren aurka ariko dira. 22 urtez azpikoetan, aldiz, Julen Retolaza eta Txomin Bereziartua Berriatuarrek (Bizkaia), Aitor Andonegi mutrikuarraren eta Koxme zumaiarren (Gipuzkoa) aurka neurtuko dituzte indarrak.
Nagusi mailan, azkenik, Berriatuko Antton eta Ubillak (Bizkaia) Unai Alberro donostiarraren eta Unai Uranga zumaiarraren aurka jokatuko dute (Gipuzkoa).
Gipuzkoako txapelketa
GRAVNI txapelketaz gain, Gipuzkoako zesta-punta txapelketako finalean ere parte hartuko dute Mutrikuko Danok Bat pelotazale elkarteko pilotariek.
Danok Bateko Eñaut Urreistik eta Hodei Arrillagak, hain zuzen ere, alebin mailako finala jokatuko dute Zumaiako bikotearen aurka, bihar, 17:00etan, Hondarribiako pilotalekuan.
Bestalde, Danok Batekoek Udaberri txapelketaren finala ere jokatuko dute, baina, palaz, nagusi mailan, gaur, 20:00etan, Aginagako pilotalekuan.
Danok Bateko Jose Mari Manzisidorrek eta Xabi Garaldek Soraluzeko bikotearen aurka neurtuko dituzte indarrak. Manzisidorrek iragarri duenez, partida «oso gogorra eta lehiatua» izango da. “Aurkariak oso gogorrak dira”.
Gipuzkoako federazioko pilotariak (eskuman). Argazkia: Danok Bat
