Lea Artibai Ikastetxeak gazteak laneratzeko programa aitzindaria jarri du abian
Lea Artibai Ikastetxeak eskualdeko langabetuen laneratze aukerak hobetzeko proiektu berritzailea aurkeztu du. Gazte Bermea sisteman izena emanda dauden 16 eta 29 urte bitarteko gazteei zuzendutako proiektu berritzailea da Lehen Job Lab, eta Europako Gizarte Funtsaren finantzazio partekatuan 2014-2020 Gazte Enplegurako Programa Operatiboaren esparruan kokatzen da.
Gazte bat praktikak egiten Lea Artibai Ikastetxean. Argazkia: Lea Artibai Ikastetxea
9 hilabeteko kontratua eta praktikak enpresetan
Programaren hasieran Lea Artibai Ikastetxeko orientatzaileek elkarrizketa egingo dute interesatuekin, proiektuak dituen lerro ezberdinetatik bakoitza zeinetan kokatzen den definitzeko; azken helburua beti ere, lana aurkitzeko aukerak handitzea izango dela nabarmendu dute.
Ikastetxeak emandako xehetasunen arabera, hautatutako pertsonek 120 orduko ikastaroa izango dute eta bertan ondokoak landuko dituzte: konpetentzia sozialak, pertsonalak eta emozionalak, enpresarialak eta kudeaketarako konpetentziak. Edukien artean, erabakiak hartzeko gaitasuna, lan-taldean aritzea, sormena eta komunikazioa landuko dituzte besteak beste.
Hasierako prestakuntza saio hauen ondoren, konpetentzia teknikoen garapena etorriko da. “Kasu horretan berariazko prestakuntza jasoko dute parte-hartzaileek eta ondoren praktika egingo dituzte enpresetan. Proiektuan bederatzi hilabeteko kontratuarekin lotuta datozen bi espezialitate nabarmentzen dira: mekanika, alor horretan gaitasunak dauzkaten pertsonentzat, eta berrikuntza esparruan, alor horretan teknikari moduan prestatu nahi direnentzat”. Halaber, parte-hartzaileen profilaren arabera, ibilbide osagarriak ere badaudela proiektuan jakitera eman dute.
Lehen Job Lab programan parte hartu nahi dutenek www.leartik.com orrialdean eman dezakete izena.
