Zapatuan egingo dute Aulestiko zaldi-mando proben lehen saioa
21:30ean hasita, Koba aulestiarra, Itziarko (Gipuzkoa) Etxeberri, eta Mungiako Goieta tabernako ordezkaria ariko dira nor baino nor gehiago.
Domekan, 18:00etan hasiko da lehia, eta hilaren 21ean, 23an eta 24ean 21:00etatik aurrera egingo dituzte saioak.
Domekako proban hiru parte hartzaile hauek egongo dira: Jose Luis Idoeta aulestiarra, Errotatxu urduliztarra, eta Patxua markina-xemeindarra.
Astelehenean, berriz, Imanol Etxeberria (Ortzaika), Nabarniz jatetxeko ordezkaria, eta Jose Angel Lopez (Laudio) ariko dira lehian. Eguaztenean lau partaide izango dira: Nabarniz jatetxea, Kortezubiko Txertudi, Mañuko Erauskin, eta Mallabiako Aterpe.
Zaldi-mando proben azken saioa eguenean jokatuko dute, eta eguaztenean bezala lau parte hartzaile egongo dira. Muruetatik Kamiñoko jatetxea ariko da lehian, Ajangiztik Burgo, Aulestitik Maider Uriarte, eta Mungiatik Goieta taberna.
Aulestiko Harri Barria
Probetan Aulestiko Harri Barria erabiliko dute, 900 kilokoa 80 kiloko gainkargarekin. Halaber, abereen oinarrizko pisua 400 kilokoa izango da. Horrela izan ezean, gehiago duten kilo bakoitzeko beste kilo bateko gainkarga izango dute. Probak hasi baino ordu bete lehenago egingo dituzte pisaketak Bizkaiko Kirol Federakundearen oniritziagaz.
Sari ugari
Sari potoloak prestatu dituzte txapelketarako. Izan ere, lehenengo hamarrentzako sariak egongo dira.
Irabazleak 800 euro, Aulestiko udalaren manta eta Urdakik emandako urdaiazpikoa jasoko ditu. Bigarrenarentzat txakolin kaxa bat eta 700 euroko saria egongo da, eta hirugarrenak 650 euro eta hiru txakolin botila hartuko ditu.
Bestalde, Lea Artibai mailako sariei dagokienez, eskualdeko lehenengo hirurek sari bana jasoko dute. Lehenengoak 200 euro, Ibetarrik emandako manta eta Sagarmiñak emandako txakolin kaxa jasoko ditu. Bigarrenak 150 euroko diru-saria eta hiru txakolin botila eskuratuko ditu, eta hirugarrenak, berriz, 115 euro eta hiru txakolin botila irabaziko ditu.
