Luis Leon Sanchezek irabazi du 56. Euskal Herriko Itzuliaren lehen etapa

2016/04/04

Luis Leon Sanchezek lortu du garaipena Markina-Xemeingo helmugan. Astana Pro taldeko txirrindulariak, hain zuzen ere, 7 urte beranduago Euskal Herriko Itzuliko etapa bat lortu du, esprintean. 03:54:21 behar izan ditu irabazleak.

Txirrindulariak helmugan sartzen

Sanchezen atzetik Cofidis taldeko Dani Navarro sailkatu da, biak ere tropetik ihesean ibili dira azken metroetan. Sailkapen nagusian hirugarrena Orica Green taldeko Simon Gerrans izan da. Bestalde, Cofidis Nicolas Edet-ek tarteko helmugen maillota eskuratu du eta Caja Rural Seguros RGA taldeko Jonathan Lastrak, ostera, mendikoarena. Azken honek, 22 urterekin, mendiko maillota eskuratu du World Tour mailako bere lehen lasterketan. Lastra, gainera, eguneko ihesaldian sartu da, baina tropelak harrapatu egin du helmugara iritsi baino kilometro batzuk lehenago.

Irteera unea, Etxebarrian

Lehen etapan ihesaldi luze bat ikusteko aukera egon da. 17. kilometroan Gianluca Brambilla (Cannondale) eta Marcel Wyss (IAM) txirrindulariek ihesaldiari ekin diote, eta handik gutxira, Jonathan Lastra (Caja Rural) eta Nicolas Edet (Cofidis) batu zaizkie. Azken kilometroetan, ordea, Dani Navarrok (Cofidis) erasoa jo du, eta Luis Leon Sanchezek berarekin bat egin du, helmugarako 5 kilometro falta zirenean. Bi txirrindulariak batera ailegatu dira helmugako azken metroetara. Bertoko txirrindulariei dagokienez, Gernika-Lumoko Pello Bilbao (Caja Rural-RGA) 52. postuan helmugaratu da (03:54:39), eta Etxebarriko Amets Txurruka (Orica Green Edge), ostera, 88. postuan (04:01:09). Bihar [apirilak 5], Markina-Xemeinen hasiko da bigarren etapa (174,2 kilometro), eta Amurrion amaituko da. Itzuliaren hasiera Etxebarria eta Markina-Xemein arteko lehen etapa egin dute gaur [apirilak 4], Etxebarriko Nemak enpresaren aurretik eguerdian irten diren txirrindulariak. 20 talde eta 160 txirrindulari inguruk zeharkatu dute Lea-Artibai eta Mutriku, tartean Etxebarriko Amets Txurruka (Orica GreenED) eta Gernika-Lumoko Pello Bilbao (Caja Rural Seguros RGA) ere. 56. Itzuliari hasiera emanez, gaur eguerdian aurkeztu dituzte, Etxebarriko udaletxean, talde guztiak. Irteera orria sinatu eta jendaurrean agertu dira Katusha, SKY, Movistar, Orica GreenED, BMC Racing, Tinkoff, Cannondale Pro Cycling, AG2R La Mondiale, Lotto Soudal, FDJ, Dimension Data for Qhubeka, Lampre – Merida, Trek-Segafred, Etixx – Quick Step, IAM Cycling, Astana, Giant – Alpecin, LottoNL – Jumbo, Caja Rural – Seguros RGA eta Cofidis taldeetako txirrindulariak. Irteeran egon dira, besteak beste, azken hiru edizioetako irabazleak: Joaquim Rodriguez (Katusha) , Nairo Quintana (Movistar) eta Alberto Contador (Tinkoff). Hutsuneak ere nabaritu dira, Movistar taldeko Izagirre anaiena esate baterako. Alberto Contadorrek, pozik eta motibatuta dagoela adierazi du, berriro ere, EHko Itzulian parte hartzeko aukera duelako. “Egia esan, eguraldiari dagokionez, lehenengo eguna ez da egunik onena baina urte asko daramatzazkit Euskal Herriko Itzulian parte hartzen, amateurra nintzenetik, eta euria guztiontzat da, beraz, gogotsu ekingo diot”, aitatu du aurkezpenean.

Amets Txurruka oparia jasotzen, goizean

Txalo zaparradarik handiena, zelan ez, bere herrian egonda, Amets Txurrukak eraman du. Txurrukari gainera, lore txorta oparitu diote herri bien izenean, Jesus Iriondo Etxebarriko alkateak, Juanjo Txurruka Markina-Xemeingo alkateak eta Joseba Iraolagoitia Markina-Xemeingo Udaleko kirol zinegotziak. Esker onez hartu du Txurrukak oparia. “Niretzako polita da Itzulia neure jaioterrian hasi izana. Gainera, badakit bertokoek ere ahalegin handia egin dutena Itzulia hemen asteko eta eskerrak eman baino besterik ez daukat”. Ibilbidea gogorra dela ere aitatu du Etxebarriko txirrindulariak eta gogor lan egin beharko dutela azpimarratu du. “Taldean aukera handiak ditugu Simon eta Adam Yatesekin eta euren alde lan egingo dugu. Ibilbideari dagokionez, aurreko egunetan ere ibili naiz beste taldekideei bidea erakusten. Ondo edo txarto irten, jakin badakit gozatu egingo dudala”. Minutu bateko isilunea Aurkezpenak eginda, Erbera kaletik irten dira txirrindulariak Nemak enpresaren aurrean egon den irteerarantz. Agintari eta antolatzaileen aurrean ohorezko aurreskua dantzan egin ondoren, minutu bateko isilunea gorde da, duela aste batzuk herrian hildako gaztearen omenez. 144 kilometro egin ondoren, Markina-Xemeingo frontoiaren aurrean izango dute helmuga txirrindulariek. Itzuliko antolatzaileek egin duten kalkulu hoberenaren arabera, gutxi gorabehera, 16:50 inguruan ailegatu daitezke txirrindulariak.