Moilara jende asko erakarri du Mutrikuko 21. Berdel Egunak

2016/04/04

Urtero modura, jendeak ez zuen hutsik egin, eta eguraldi ona lagun, jende asko batu zen zapatuan [apirilak 2] Mutrikuko 21. Berdel Egunean. Antolatzaileek nabarmendu dutenez, pozik geratu dira jaiak beste urte batez izan duen arrakasta handiarekin. “Eguraldia lagun, urteroko giro berezia egon da”, azaldu dute.

Jendea pintxoak dastatzen, arratsaldean

Batez ere, eguerditik aurrera jende asko nabaritu zen Mutrikuko kaleetan barrena, eta egin ziren ekimenetan nahikoa jende batu zen. Herriko abesbatzek Zabiel plazan eskaini zuten kontzertuan, esaterako, ikusle asko egon zen. Era berean, eguerdian herrira hurbildu zirenek tabernetan askotariko berdel pintxoak dastatzeko aukera izan zuten. Eta, eguerdikoa eta gero, giro onak moilan jarraitu zuen.

Berdel errea prestatzen

18:00etan hasi zen pintxo dastaketa herrikoia, eta ordurako, berdel usaina nagusi zen moila eta inguruetan. Giroa lasai berotzen hasi bazen ere, pixkanaka, berdel pintxoak probatzeko ilara luzeak sortu ziren. Iragarri modura, Mutriku herritarrez eta kanpotarrez bete zen. 18:30erako, esaterako, portua eta inguruak jendez gainezka zeuden. Beti-betiko zein pintxorik berritzaileenak gustura jan zituzten moilara hurbildu zirenek, eta eurak dastatzera adin guztietako jendea hurbildu zen. Familiak umeekin, helduak, gazteak… denetarik ibili zen berdela dastatzeko asmoarekin. Eguraldi ederretan moilara bertaratutakoak gustura ibili ziren pintxoak dastatzen, eta orduek aurrera egin ahala, mahaietan geratzen ziren pintxoak gero eta gutxiago ziren. Antolatzaileen esanetan, berdel errea amaitu zen, lehendabizi.

The Uski’s taldearen kontzertua

Pintxo dastaketaren amaieran, Busturialdeko The Uski’s taldeak eskaini zuen kontzertuak giroa guztiz berotu zuen, eta 21:00ak arte, gazte zein nagusiek “ikutu marinela” duten kantu dantzagarriez gozatzeko aukera izan zuten. Eta hortik aurrera, jaia etenik gabe ospatu zuten mutrikuarrek eta beste herrietako bizilagunek. Era berean, Miruaitz frontoia pilotazaleez bete-bete egin zen. Izan ere, II. Berdel sariaren finalak jokatu zituzten Mutrikuko eta Markina-Xemeingo puntistek. Gazte mailan, Ekaitz Mendizabalek eta Mikel Manzisidorrek (Danok Bat), Gotzon eta Ibarluzearen (Markina-Xemein) aurka jokatu zuten, eta nagusi mailan, aldiz, Jon Goenagak eta Aitor Andonegik (Danok Bat), Urri eta Gandiagaren (Markina-Xemein) aurka aritu ziren. Bi partidak etxeko taldeak irabazi zituen. Gazte mailan 30-24 irabazi zuten, eta nagusi mailan, aldiz, 30-16. Bestalde, bere alde txarra ere izan zuen jaiak. Auto batek edo bestek kalteak jasan zituen, eta horrez gain, hainbat zakarontzi apurtu zituztela jakitera eman dute Mutrikuko Udaletik.