Bertsio Gaba ospatuko dute zapatuan Mutrikun
Mutriku Rock Kolektiboaren eta Gaztetxearen laguntzarekin, Mutrikuko Jai Batzordeak Bertsio Gaba izeneko ekimena antolatu du zapaturako [apirilak 16]. Pintxo potearekin hasiko dira ekintzak, gaztetxean, eta kontzertuekin amaitu. Biltzen den diru guztia Jai Batzordearentzat izango dela jakitera eman dute.
Pintxo potea 19:00etan hasiko da, eta Bertsio Gabarekin lotuta egongo da. Horrela, “pintxo bertsionatuak” eskainiko dituzte aurreratu dute: Potato, elektrotuna, Chuck Berry, Tijuana In Blue…
23:00etatik aurrera, aldiz, musika izango da gaztetxeko protagonista. Izan ere, MRK-ko musikariek talde ezagunen bertsioak eskainiko dituzte. “MRK-ko musikari ezberdinak igoko dira agertokira eta taldekako formatuan ariko dira”, azaldu dute.
Horrela, bertsionatuko duten taldeei keinu eginez, ondoko izenak jarri dizkiete kontzertuan ariko diren taldeei: Gau Tribu, Su ta Belar, Black Fyah, Extremoduo eta Fool Fighters.
Bi ekintza horiekin, beraz, ondo pasatzeko aukeraz gain, jaietan ekintzak egin ahal izateko dirua bilduko dute.
