Elizpean batu dira Lekeitioko gazteak Zeresana Eguna ospatzeko

2016/04/23

Goizetik hasita, Zeresana Eguna ospatzen dabiltza gaur [apirilak23], Lekeitioko gazteak. Euriari ihes egin nahian, elizpean elkartu dira paellak egin eta bazkaltzeko. Zeresana Eguna aukeratu dute Lekeitioko gazteek, Zeresana proiektu komunikatiboari hego berriak emateko. Horrela, gazteentzako komunikabide garrantzitsu bat izan zena berreskuratuko dute, eta horren berri emango dute gaurko jaian.

Gazteak paellak prestatzen elizpean.

Aldizkaria izan zen lehenbizi Zeresana. 2000 urtetik 2005era atera zituzten aleak. Bien bitartean, gainera, internetera jauzia eman zuen, eta luzaroan jarraitu zuen gazteei interesatzen zitzaizkien gaietaz hitz egiten. 2010. urtean, Zeresana Egunaren urteurrenaren harira, ale berezia ere, kaleratu zuten gazteek. Ibilbide hori guztia gogoratzeko aukera izan dute bai gazteek zein elizpera hurreratu diren guztiek, hantxe, sarreran, egon dira eta historia eta istorioz betetako aleak ikusgai. Gazteen arteko komunikazioa sendotu eta indartzeko baina, komunikabideak baino gehiago behar da, eta horren jakitun jaia ere izaten da Zeresana Eguna. Paellak bazkaldu, elkarregaz jolastu eta pantaloi eta kantzontzilo lasterketa ere izango dute gaurkoan.