Geoparkeak marearteko zabalgunera bisitak egingo ditu, estreinako, Mutrikun
Euskal Kostaldeko Geoparkeak iragarri duenez, hemendik aurrera Marearteko zabalgunera egiten diren irteerak Mutrikun ere egingo dira, estreinako. “Euskal Kostaldeko Geoparkeak astebururako programatu dituen bisita gidatuen artean berrikuntza bat dago. Orain arte, Zumaian eta Deban eskaintzen zuen Geoparkeak irteera gidatu hau, baina, hemendik aurrera Mutrikun ere egingo da”.
Mutrikun, hain zuzen ere, bi bisita gidatu egingo dira asteburuan; bata, zapatuan (gazteleraz), eta, bestea, domekan (euskaraz). Bisita gidatu biak 10:00ak hasiko dira turismo bulegoaren aurrean, eta 13:15ean bueltan amaituko dira.
Bisitariak turismo bulegoaren aurrean batu ostean, Atxukale aldera joango dira, eta handik, portu aldera egingo dute. Bisita gidatuaren arduradunek aurreratu dutenez, portuan geldialdi txiki bat egingo dute, igerileku zaharraren inguruan. Azkenik, igerilekutik Burumendi aldera joango dira, eta handik hirugarren hondartzara jaitsi ondoren, marearteko zabalgune “ikusgarria” eta inguruan dauden itsas animaliak eta landaredia gertutik ezagutzeko aukera izango dute bisitariek. “Hirugarren hondartza, bereziki, herritik oinez erraz joateko moduan dagoelako aukeratu dugu”.
Antolatzaileen esanetan, bisita gidatuak biologiari erreparatzen dio, batik bat. “Bisita harrigarri hau itsasbehera oso behean dagoenean bakarrik egin daiteke. Gidari espezializatu baten laguntzaz, marearteko zabalgunea ezagutuko dugu, labarren oinarrian azaleratzen den plataforma harritsua. Oso ekosistema aberatsa dauka: itsas izarrak, olagarroak, itsas erbiak eta bestelako izakiak aurkituko ditugu; kolore eta forma anitzetako bizitza zabalduko zaigu begien aurrean”.
Erreserbak, alde aurretik
Antotzaileek nabarmendu dutenez, irteera, oro har, publiko zabalari eta 8 urte arteko haurrak dituzten familiei dago zuzendua. Gogorarazi dutenez, haitzetan ibiltzeko oinetako egokiak eta ura eramatea gomendagarria da.
Bisita gidaturen batean parte hartu nahi izanez gero, aurretik egin beharko da erreserba Geoparkearen webgunean bertan. Era berean, asteburuan, Mutrikuko irteeraz gain, Deba eta Zumaian ere izango da irteera horiez gozatzeko aukera.
Mutrikuko marearteko zabalgunea. Argazkia: Mutrikuko turismo bulegoa
