Ispasterko mugarriak ezagutzeko ibilaldiak egingo dituzte

Aintzina Monasterio

2016/05/04

Ibilbidean zehar zeharkatuko duten mugarrietako bat.

Lehenengo txangoa domekan egingo dute. 08:30ean udalerriko plazan elkartu, eta Lekeitiora autoetan joango dira, bertan ibilaldiari ekiteko. Ondoren, Lekeitioko itsasargitik hasiko dute ibilaldia, eta Eguen Goikoan amaituko dute. Hau da, Ispaster eta Gizaburuaga udalerrien mugan bukatuko dute txangoa. Hamabost kilometro inguruko ibilbidea burutuko dute, eta lau bat ordutan egiteko moduko ibilaldia dela aurreikusten dute udal ordezkariek. Guztira, lau mugarrietatik zehar egingo dute txangoa. Hain zuzen ere, Lekeitio eta Ispaster, Lekeitio, Ispaster eta Mendexa, Amoroto eta Ispaster, eta Gizaburuaga eta Ispaster arteko mugetatik barrena ibiliko dira. Lekeitioko itsasargitik Eluntzetarantz joango dira Maderas de Lekeitio izan zan enpresaren paretik. Gero sahiesbide azpitik Gardata azpira pasatuko dira, eta handik Lekeitioko futbol zelaira helduko dira. Izan ere, futbol zelaiko ate bat Lekeitioko lurretan dago, eta bestea Ispasterko lurretan. Ondoren, Arropainera ailegatuko dira, eta Maderas Eiguren lantegiaren albotik, Zubieta Apartahotelaren sarrerara joango dira. Bertatik Lumentza mendira heldu, eta jarraian, Arropaineko Mesoi taberna atzetik Magdalena ermitara pasatuko dira. Gero, Liako zubi ondotik pasatu eta Oletako gasolindegitik Kostatzara igoko dira, Txantantorre azpira. Ostean, Abitxa gainera igo, eta bide gorria hartuko dute Lariz-Oletararte. Handik Ezuneta baserrira joan, eta eguneko ibilbidearen azken mugarrian amaituko dute txangoa, Eguen Goikoan. Parte hartzaileen bila autoetan joango dira Eguen Goikora, eta handik autoetan bueltatuko dira Ispasterrera. Hiru ibilaldi Ispasterko udaletik jakitera eman dutenez, udalerrietako mugetatik guztira hiru ibilaldi egingo dituzte. Domeka honetakoaren ostean, maiatzaren 22an egingo dute hurrengoa, eta azkena, berriz, ekainaren 12an burutuko dute.