Astelehenetan ere bentarik ez egitea aztertzen ari dira, antxoa kostera luzatzeko
Antxoaren kostera luzatu aldera hainbat neurri hartzen ari dira egunotan. Aurreko astean, esaterako, kostera amaitu arte, barikuetan bentarik ez egitea erabaki zen. Orain, ordea, neurri horrez gain, astelehenetan ere ez egitea aztertzen ari dira kofradietako arduradunak. “Kostera amaitu arte barikuetan, printzipioz, ez da bentarik egingo, eta asteleheneko benta ere, ez egitea aztertzen ari dira”.
Kostera luzatu aldera, gainera, ontziei kuota zehatz batzuk ezarri zaizkie. Neurri berri horren arabera, ontzi bakoitzak, 10.000 kilo antxoa orez, 6.000 kilo harrapatu ahal izango ditu, gehienez, eguneko. Ontzi txikiagoen kasuan, 5.000 kiloko izango da muga.
Astelehenean [maiatzak 2], Ondarroan, esaterako, antxoa asko egon zen, eta horren eraginez, prezioak asko amildu ziren. Hori ekidin aldera ere, benta ez egitea, edo arintzea aztertzen ari dira, prezioak mantendu ahal izateko. Datuei erreparatuz, 83 ontzik 378.000 kilo antxoa lehorreratu zituzten, eta bataz beste, 1,14 euroan saldu zen kiloa.
Bentako arduradunen hitzetan, lehen bentetako arraina nahikoa prezio onean saldu zen (3 eta 2,5 euroan kiloa), baina orduak igaro ahala, arrainaren prezioa nabarmen jaisten joan zen (kiloa 30 zentimotan ere saldu zen). “Astelehenean arratsaldeko lehen orduetarako lehorreratu ziren ontziak. Lehen benta horietako arraina nahikoa garesti saldu zen, baina iluntzeko arraina kanpora bidaltzeko astirik ematen ez duenez, asko merketu zen”.
Martitzenean [maiatzak 3], ere nahikoa antxoa saldu zen Ondarroan. 45 ontzik 233.00 kilo lehorreratu zituzten, eta prezio aldetik ere zer edo zer garestiago saldu zen; bataz beste, 1,19 euroan, kiloa. Atzo [maiatzak 4] eta gaur [maiatzak 5], ostera, ez da antxoa askorik saldu Ondarroako portuan. Bilbo eta Santander (Kantabria) parean ari dira arraina harrapatzen, eta ontzi askorek, hurreragoko portuetan deskargatzea erabaki dute, Santoña eta Laredoko portuetan, esaterako.
Martxoaren 14ko istripua eta gero itxita egon ostean, egunotan martxan hastekoak dira izotz fabrikan ere. “Guztia prest dago. Martxan hasi ahal izateko baimen baten zain gaude. Baimen hori lortu orduko, hasiko gara ohiko martxagaz.”.
Antxoa kostera hasieran gertatu zen istripua, eta denei izotza banatu ahal izateko nahikoa arazo izan dituzte kofradian. Arduradunen esanetan, egoera “nahikoa kritikoa” izan da, eta denei erantzuna ematea ez da erraza izan. “Arazoren bat edo beste izan dugu, baina horieik ahalik eta hobetoen erantzuten saiatu gara”.
Izotz fabrika itxita egon den tartean, kanpotik ekarri dute izotza, eta lagundu duten kofradiei eskerrak eman nahi izan diete Ondarroako arduradunek. “Eskerrak eman nahi diegu ia bi hilabete hauetan izotza ekartzen lagundu diguten Getariako, Lekeitioko, Bermeoko kofradiei”.
Antxoa kaxak Ondarroako kofradia aurrean pilatuta
Ondarroako portuko izotz fabrika, gaur goizean, ateak itxita
