Markina-Xemeingo merkatarien elkarteko dendak kalera aterako dira 10. urteurrena ospatzeko
Ona badago Zelaian eta euria balego frontoian. Egiten duena egiten duela ere, kalera aterako dira Markina-Xemeingo merkatariak, elkartearen 10. urteurrena herritarrekin ospatzeko. Ilusio guztiagaz prestatu dute, zapatuan [maiatzak 14], 10:00etatik aurrera zabalik egongo den azoka berezia. Txosna, musika eta sukaldaritza tailerragaz girotuko dute Zelaian jarriko duten merkatua.
Hemen Be Bai elkarteko 23 dendek aterako dituzte produktuak kalera: Itxurriño altzariak, Josune, Mafre, Kukubiltxu, Txispita, Txanbelin, Onkaia, Euskitze, SK8, Nerea, Artibai Optika, Ixaie, Ule Motx, Jaia Alai, Itxas Lur, Maria Jesus janari denda, Casa Pepa, Makina, Baskaran, Esti Olasolo diseinua, Loirats, Alarabi eta Amandarokua. Beraz, era guztietako produktuak eskuratzeko aukera egongo da, arropa, janari, osagarri eta betaurrekoak besteak beste.
Egun osoan zabalik
Denden postuak bata bestearen ondoan jarrita egongo dira eta sarrera Iru Zubi aurrean egongo da. Ekitaldietako eskenatokia, bestalde, erdian ipiniko dute. «Txosna bat ere egongo da egun osoan zabalik», azaldu dute elkarteko arduradunek.
10:00etatik 17:00etara egongo dira postuak zabalik, etenik barik. 11:00etan, berriz, Kalapitxiren kontzertua egongo da eta 13:00etan, apirilean egindako argazki lehiaketako saridunari 200 euroko txartela emango diote, elkarteko dendetan gastatzeko.
Arratsaldean, ostera, umeentzako sukaldaritza tailerra egongo da Itsas Lur jatetxearen eskutik eta 18:00etan kontzertua emango du Itzalak taldeak.
Herriko merkatari elkartearen jaiaren helburua herritarrekin ospatu eta bide batez herrian dauden aukerak erakustea ere bada. «Batzuetan herritik kanpo joaten da jendea erostera eta bertan ere eskaintza zabala daukagula erakutsi nahi diegu».
Herritarren iritzia ere jaso nahi du elkarteak, eta horretarako, galdeketa anonimo bat ere prestatu dute.
Hemen be bai elkarteko kide batzuk Gabonetako sari banaketan. Argazkia: Hemen be bai
