Ziortza-Bolibar Uemako kide izatea onartuko dute zapatuan
Udalerri Euskaldunen egunaren barruan egingo dute zapatu goizean [maiatzak 28] Udalerri Euskaldunen Mankomunitatearen Batzar Nagusia, Leitzako udaletxean. Bertan, Uema osatzen duten udalerrietako ordezkariek Ziortza-Bolibarko udalak egindako eskaera bozkatuko dute.
Hain zuzen ere, apirilaren 18ko Ziortza-Bolibarko udalaren Osoko Bilkuran egin zuten Ueman sartu ala ez erabakitzeko bozketa. Agintean den EH Bilduko lau ordezkariek Ueman sartzearen aldeko botoa eman zuten, EAJ-ko hiru zinegotziak, ostera, abstenitu egin ziren. 434 biztanle ditu gaur egun Ziortza-Bolibarrek, eta horietatik %90a da euskalduna.
Era berean, Legorretako udalak eta Dimako udalak egindako eskaerak ere bozkatuko dute.
Hiru udalerri horien eskaerak onartzean, 76 udalerri izango dira Uemako kide.
Egun osoko jaia
Zapatuan Leitzan (Nafarroa) ospatuko dute Udalerri Euskaldunen Eguna. Horrela, erakundeak betetzen duen mende laurdena ospatzeko ere baliatuko dute, 25 urte euskara hauspotzen lemapean.
Uemako kide diren udalerriekin ez ezik, Euskal Herri osoko udalerri euskaldunen parte-hartzearekin ospatuko dute eguna.
Uemako ordezkarien, Leitzako Udalaren eta herriko zenbait elkarte eta kultur eragileren artean egun osorako hainbat ekitaldi antolatu dituzte, adin eta gustu guztietarako eskaintza eta jai eguna osatzeko asmoagaz.
Besteak beste, herrien arteko herri kirolak, bazkari herrikoia, kantaldia, aurrentzako ikuskizuna, elektrotxaranga, eta kontzertuak egongo dira, eta egun osoan zehar kale animazioa edukiko dute.
Eguerdiko ekitaldi instituzionalean, udalerri euskaldunek duten garrantzia nabarmenduko dute, eta baita azken 25 urteotan euskararen normalizazioari egin dioten ekarpena ere. Erakunde publikoetako, euskalgintzako zein beste hainbat alorretako ordezkaritza ere izango da ekitaldian.
Autobusa Aulestitik eta Munitibarretik
Mutrikuko eta Lea-Artibaiko herritarrak ere Leitzan egongo dira, eta esaterako, Aulestitik eta Munitibarretik autobusa antolatu dute.
09:00ak inguruan abiatuko dira, eta Leitzan 20:00etan irtengo dira etxera bueltatzeko.
Egitaraua:
Udalerri Euskaldunen Egunaren aurkezpena. Argazkia: Uema.
- 09:00. Diana txistulariekin. herriko kaleetan zehar.
- 10:00. Arnasguneen tailerra. Atekabeltz gaztetxean.
- 10:00. UEMAren batzar nagusia. Udaletxean.
- 11:30. Herrien arteko kirolak. Herriko Plazan.
- 12:30. Ekitaldia: ‘Udalerri euskaldunak, 25 urte euskara hauspotzen’. Leitzako Aurrera Dantza Taldearen eta Jeiki abesbatzaren parte-hartzearekin.
- 13:15. Flash moba: ‘Euskara hauspotzen’.
- 14:30. Bazkari herrikoia.
- 15:30. Kantaldia, Angel Mariezkurrena abeslariarekin.
- 18:00. Haurrentzako ikuskizuna: DJ Porru. Kiliklon ekoizpenak.
- 19:30. R Ke R elektrotxaranga, herriko kaleetan barrena.
- 23:30. Kontzertua: Lur J eta Akort. Atekabeltz gaztetxean.
