Lea-Artibaiko eragileek Agirre lehendakaria ezagutzera eman dute Berlinen
Jose Antonio Agirre lehendakaria Berlinen erbestean bizi izan zela 75 urte bete dira aurten, eta urteurrena dela eta, hainbat ekitaldi antolatu dira bertan. Gerra zibileko urteak eta euskal erbesteak arte eta diziplina desberdinetan izan duten itzala eta garrantzia aztertzen ari dira argitalpen, hitzaldi eta bestelako ekintzen bidez. Iñaki Goiogana historialariak eta Mikel Anton Eusko Jaurlaritzako Europako Gaien Zuzendariak, biak lekeitiarrak, parte hartu dute ekitaldietan, besteak beste.
Martitzenean hasi ziren ponentziak eta egun osora zabaldu dira ekitaldiak, gaur [ekainak 2]. Euretako batzuetan hartu du parte Kirmen Uribek. Goizean, Humboldt unibertsitatean hitzaldi bat eman du idazle ondarrutarrak eta, iluntzean, Mikel Urdangarinekin batera Maxim Gorki antzokiko R aretoan Zaldiak eta beren itzalak ikuskizuna eskainiko du.
Unai Lauzirika lekeitiarra Leipzigeko unibertsitateko euskara eta euskal kultura irakurlea eta Berlingo Euskal Etxeko proiektu zuzendariak zuzentzen du Agirre in Berlin 1941-2016 proiektua, eta egitasmoak Agirreren figura eta eragina aztertu eta erbesteko eusko jaurlaritzaren lana ezagutzera ematen dituela azaldu du.
«Berlingo Euskal Etxeak Agirreren egunkari originalak eta De Gernika a Nueva York pasando por Berlin liburuetan Alemaniari dagozkion zatiak alemanera itzuli ditu, eta Agirrek Berlingo egonaldiari buruz egunkarian esandakoak islatzen dituen mapa osatu du Euskal Etxeak», zehaztu du Lauzirikak.
Testu, mapa eta programa osoa www.agirreinberlin.eus webgunean dago erakusgarri.
Iñaki Goiogana Sabino Arana Fundazioko artxibozaina eta Unai Lauzirika Agirre in Berlin proiektuaren zuzendariaBerlingo Cervantes Institutuan. Argazkia: Unai Lauzirika
Berlingo Euskal Etxeko kideak, Mari Jose Olaziregi (Etxepare Institutua). Juan Jose Ibarretxe lehendakaria eta Amaia Agirre (Agirre Lehendakaria Center), Berlingo Diputatu Ganberako ordezkariak. Argazkia: Unai Lauzirika
Agirre in Berlin proiektuaren aurkezpena hiriko erakundeetako ordezkarien aurrean. Mikel Anton, Europako Gaien Zuzendaria eta Andreas Gram, Diputatu Ganberako Presidente Ordea. Argazkia: Unai Lauzirika
