Ondarroako kofradian benta egunero egitea erabaki dute
Ondarroako Kalare Deuna kofradiako arduradunek iragarri dutenez, egunero egingo da benta, hemendik aurrera. Antxoa kostera luzatu aldera, benta egunak mugatuta egon dira, martitzenetik eguenera egin da benta, baina orain hartutako neurria eta gero, astelehenetik barikura salduko da arraina.
Hori bai, asteleheneko eta barikuetako bentetan, oraingoz, ez da antxoarik salduko. “Beste espezie guztiak saldu ahal izango dira, antxoa izan ezik”, nabarmendu dute Ondarroako kofradian.
Antxoa harrapaketei dagokienez, adostutako gutxieneko neurria ere aldatu egin dute. Orain, kiloan, ezingo dira 70 ale baino gehiago sartu (aurreko astean, kiloko 55 ale baino gehiagoko antxoa ez harrapatzea adostu zuten).
Asteon, berriz, eguraldi txarra egon da itsasoan, eta ez da antxoarik saldu Ondarroako bentan. Ontzi asko kostatik gertu itsasoratu dira, eta, oro har, arrain gutxi lehorreratu dute. Betandi, boba eta txitxarro ale gutxi batzuk saldu dira egunotan.
Martitzenean [maiatzak 31] eta eguaztenean [ekainak 1], esaterako, txitxarro zuri gutxi harrapatu zutenez, nahikoa garesti saldu zuten; 3,36 euro eta 2,32 euroan, bataz beste. Gaur [ekainak 2], ostera, kopuru aldetik gehiago egon denez, merkeago saldu da; kiloa, 1,70-0,80 euro bitartean.
Bestalde, ontzi batzuk astelehenean [ekainak 6] hegaluzetara irtengo dute, Azores aldera. Arlanpi eta Itoitz ontzi ondarrutarrek dena prest dute itsasoratzeko.
Asteko salmenta:
Arrantzaleak legatza deskargatzen, Ondarroan
- MARTITZENA [maiatzak 31]
- Betandia. 3.200 kilo; 1,63 euro, bataz beste.
- Boba. 2.400 kilo; 38 zentimo, bataz beste.
- Txitxarro zuria. 6.900 kilo; 3,36 euro, bataz beste.
- EGUAZTENA [ekainak 1]
- Txitxarro baltza. 1.500 kilo; 42 zentimo, bataz beste.
- Txitxarro zuria. 4.300 kilo; 2,32 euro, bataz beste.
