Herriko 39. Esku Pilota Txapelketako finalak jokatuko dira Markina-Xemeinen
Asteburu garrantzitsua dauka aurretik Markina-Xemeingo Esku Pilota Taldeak. Alde batetik, Markinako 39. Esku Pilota Txapelketa jokatuko dute domekan [ekainak 12], herriko frontoi txikian, eta bestetik, Bizkaiko 47. Herriarteko Esku Pilota Txapelketako finalaurrekoetako joaneko esku pilota partida izango dute zapatuan [ekainak 11], Zornotzaren aurka.
Maiatzaren erdian hasi zuen herriarteko txapelketa Markina-Xemeingo taldeak eta Gernikako taldeari final erdietan irabazi ondoren finalaurreetara ailegatu da. Joaneko partida izango du lehenengo, bere herrian bertan, eta datorren astean itzuliko partida jokatuko dute Zornotzan.
16:30ean hasiko da lehia kadeteen partidagaz, eta ondoren, gazteak eta nagusiak aterako dira Markina-Xemeingo pilotaleku nagusiko kantxara. Aurrera egiteko indartsu dago taldea, baina herritarren animoak ere eskertuko dituzte finalaren aurreko azken txanpari aurre egiteko. “Berriro ere etxeko taldea maila gorenera iristear dago eta horretarako herritarren laguntza eskatzen dugu. Ia frontoia betetzen dugun”.
Bizkaiko Herriarteko txapelduna izan zen iaz Markina-Xemeingo Esku Pilota Taldea eta aurten ere txapela janztea dute helburu.
Markina-Xemeingo Txapelketa
Zapatuko hitzordu garrantzitsuaren ostean, beste ekitaldi garrantzitsu bat izango dute hurrengo egunean, Markina-Xemeingo Esku Pilota Taldekoek. Oraingoan, gainera, maila guztietako pilotariak ikusteko aukera egongo da.
Apirilaren lehen astean hasita, jokoan egon da Markina-Xemeingo 39. Esku Pilota Txapelketa. Domeka goizeetan jokatu dituzte partidak, batez ere, baina barikuren batean ere egon dira norgehiagokak frontoi txikian.
7 urteko pilotari gazteetatik hasi eta nagusiak arte parte hartu dute herriko txapelketan eta, domekan [ekainak 12] erabakiko dira irabazleak, 10:00etatik aurrera jokatuko diren partidetan.
PARTIDAK
Herriarteko txapelketa jokatzen ari diren Markina-Xemeingo Esku Pilota Taldeko pilotariak eta entrenatzailea. Argazkia: Markina-Xemeingo Esku Pilota Taldea
- Txikiak 1: Urbieta-Sololuze/Etxebarria-Leordean
- Txikiak 2: Mallagaray-Gabikagogeaskoa/Albizu-Arrazua
- Haurrak: Ibarzabal-Maguregi/Galdos-Landaluze
- Umetxoak: Alvarez-Egurrola/Calvo-Idigoras
- Umeak: Etxebarria-Egurrola/Ibarloza-Urrutia
- Gazteak: Onagoitia-Malaxetxebarria/Bereikua-Gisasola
- Nagusiak: Arrizabalaga-Arrasate/Zubikarai-Urizar
