Ate irekien jardunaldia egingo du Ondarroako Barnetegixak
Hiru gaztek Ondarroako Txomin Agirre 34. zenbakia duen etxea okupatzea erabaki zuten 2011ko irailean, eta geroztik, eraikin osoa bete arte, beste hainbatek bide bera jarraitu dute. Momentu honetan 15 bat gazte bizi dira bertan, eta zazpigarren eta azken etxebizitza atontzen ari dira, ganbaran. Etxebizitzez gain, herriko artisten eskultura, margo eta joste tailer bana ere badaude eraikinean.
Udalaren eraikina den arren, erabilerarik barik egon da hainbat urtez Ospital zaharra edo Barnetegia izandako eraikina. Barnetegi modura funtzionatzen egon zenez geroztik, eraikina itxita zegoen, eta ondorioz, jausten eta usteltzen ari zen. Bertan bizi ahal izateko, hainbat konponketa egin behar izan dituzte bertako bizilagunek; teilatua konpondu, leihoak aldatu, erortzen ari ziren sabaiak konpondu eta egonkortu, argindar sistema berritu…
Norbere etxebizitza atontzeaz gain, beheko solairua atontzen ibili dira auzolanean, eta solairu horretan dauden areto nagusi biak, hain zuzen ere, herriaren erabilpenerako uztea erabaki dute.
Herritarrak azpiegitura horiek erabiltzera animatu nahi dituzte, eta horretarako, ateak irekiak jardunaldia egingo dute barikuan [ekainak 17] eta zapatuan [ekainak 18]. “Bizitzeko tokia izan daitezkeen espazioak bete ostean, libre geratzen diren toki bakarrak beheko solairuko areto handi biak dira, eta horiek herrira begira zabaltzea erabaki dugu. Momentuz ez dakigu tokiari zer erabilpen eman diezaiokegun, baina herrian dauden interesen araberakoa izan beharko dela uste dugu”.
Ate irekiak jardunaldian, hain zuzen ere, euren proiektua ezagutara eman nahi dute, ekitaldi xume bategaz. Jarduerak espazio hutsak berrerabili dituzten hainbat kideren solasaldiagaz hasiko dituzte barikuan [ekainak 17]. “Mahainguru horretan espazioak okupatu dituztenen esperientziak entzuteko aukera egongo da”.
Zapatuan [ekainak 18], ostera, ate irekiak jardunaldia egingo dute, 10:00etan hasita. Bertaratzen denak eraikina barrutik ezagutzeko aukera izango du, eta nahi duten guztientzat gosaria ere egongo da, txokolate bero eta txurroekin. Eraikina barrutik ezagutu ostean, Barnetegixan bizi direnek euren esperientziaren berri emango dute, eta aurrera begira zer asmo duten kontatuko dute jendaurrean.
Eguerdian, berriz, bazkaria egingo dute Barnetegixeko jantokian. Bazkarirako 60 txartel ipini dituzte eskuragarri, eta horiek aldez aurretik Mamun, Anaitasunan eta Kulixkan erosi ahal izango dira, bost euroren truke.
Bapo bazkaldu ostean, bertso saioa egingo da Nerea Ibarzabal, Imanol Lekunberri, Xabat Galletebeitia, Malen Amenabar eta Jagoba Apaolaza bertsolariekin batera. Gaztetxean egingo diren kontzertuekin amaituko dituzte eguneko ekimenak.
EGITARAUA
Txomin Agirre 34. zenbakiko eraikina
Barnetegixeko bizilagunak, ate irekiak jardunaldian parte hartzeko deia egiten
- Barikua [ekainak 17]
- 19:00. Espazixo hutsan berrerabilpena solasaldia Barnetegixan. Gonbidatuak: Ondarroako Santa Ana baserriko kideak, Bilboko Okela sormen lantegiko kideak eta Gasteizko Errekaleorreko kideak.
- Zapatua [ekainak 18]
- 10:00. Ate irekiak, Barnetegixan.
- 12:00. Barnetegixeko kideek zertan ari diren aurkeztuko dute.
- Ostean. Txikiteoa herrian zehar.
- 14:00. Bazkaria Barnetegixeko jantokian.
- 18:00. Bertso saioa Barnetegixan.
- 21:00. Joxpa taldeagaz erromeria, Gaztetxean.
- 23:00. Kontzertuak Gaztetxean: Pornox, Wild beach eta D.J. Diaz.
