Debabarreneko akordeoi eta Madalen abesbatzaren kontzertua, Mutrikun
Debabarreneko akordeoijoleak eta Mutrikuko Madalen eta Madalen Txiki abesbatzek 26. kontzertua eskainiko dute bihar [uztailak 9], 23:00etan hasita, Goiko Plazan. Akordeoijoleek bost pieza eskainiko dituzte eta abesbatzakoek beste horrenbeste. Dena dela, pieza batzuk elkarrekin eskainiko dituztela aurreratu dute antolatzaileek.
Beste behin ere, Julia Iriondok zuzenduko du emanaldia. «Iaz 25. urteurrena zela eta, ekitaldi berezia egin genuen. Aurten, aldiz, ez dugu ezer berezirik egingo; ikuskizunak ohiko formatua edukiko du. Baina herritarrek musikagaz gozatuz giro onean egoteko aukera ona edukiko dute», dio Iriondok.
Parte hartzaileak. Akordeoijoleak Ondarroa, Deba, Mendaro, Elgoibar eta Eibartik etorriko direla azaldu dute. «Bateko eta besteko taldeekin, guztira 60 bat herritar igoko dira oholtzara». Parte hartzaile gehienak, baina, mutrikuarrak izango direla azpimarratu dute.
Abesbatzetako eta akordeoijoleekin batera, Mutrikuko Gure Ametsa dantza taldeko dantzariek ere parte hartuko dute ikuskizunean.
Instrumentuak jotzen ere mutrikuarrak egongo dira, orain arte modura: Ainhize Azpiazu (txistua), Ion Azpiazu (tronpeta), Eduardo Yurrita (pianoa) eta Ion Lekube eta Fernando Urkiri (perkusioa).
Eguraldia. Aurten, gainera, eguraldia aldeko edukiko dutelakoan daude antolatzaileak. «Iaz eguraldi txarra egin zuen eta espero dugu aurten ona egitea. Dena dela, ziur gaude jendea batuko dela Goiko Plazan».
Errepertorioa
Mutrikuko akordeoi kontzertuko parte hartzaileak
- Akordeoi orkestra
- Agurra. Herrikoia.
- Y.M.C.A. J. Morali. Madalen Txiki abesbatzak ere parte hartuko du, kantatuz eta koreografia eginez.
- Jelousie (tangoa). Bruno Hartmann. Bakarlaria: Oihana Etxabe.
- Brasilia (popourri). Moldaketa: Willi Münch.
- Betikoskorri (popourri). Moldaketa: Julia Iriondo. Madalen abesbatzak ere parte hartuko du.
- Madalen abesbatza
- Andre Madalen. Moldaketa: Josu Elberdin. Akordeoia: Maite Mugartegi.
- Neska Zaharrak. Pascual Aldave.
- Itsasoa gara. Ken Zazpi. Moldaketa: Xabier Sarasola.
- It’s raining men. Moldaketa: Greg Gilpin. Bakarlaria: Nahiara Arrieta.
- Euskal Musikaren Gorespena.
