Lekeition ere, indarkeria sexistarik gabeko jaiak nahi dituzte
San Antolin jaietan ere, Lekeitio, “Indarkeria sexista gabeko gunea” izatea nahi du Lekeitioko Emakumea eta Berdintasun Batzordeak. Hori dela eta, hainbat ekimen antolatu dituzte jaiei begira. Irailaren 5ean, Antzar egunean, esate baterako, 12:00etatik 15:00etara, informazio eta aholkularitza haima bat jarriko dute plazan, antzar jokoan parte hartuko duten potinen zerrenda antolatzeko egiten den zozketaren gunearen ondoan.
Azaldu dutenez, emakumeak eta herritarrak indarkeria sexistaren gaiaz kontzientziatzea, emakumeek jaietan indarkeria sexistarekiko dituzten bizipen, iritzi eta interesak jasotzea, erasotzaile izan daitezkenei dena libre ez dela eta erasoak dauden kasuetan erantzuna izango dutela ohartaraztea eta maitasun erromantikoaren eredua zalantzan jarri eta plazerrean oinarritutako harreman osasuntsuak bultzatzea izango ditu helburu, besteak beste, Indarkeria sexista gabeko guneak.
Horretarako, indarkeria sexista, autodefentsa feminista eta maitasun erromantikoari buruzko informazio panelak, eskuorriak, indarkeria sexistaren aurkako txapak sortzeko makina eta indarkeria sexistak eta erasoak salatzeko zein gozamena eta ligoteo osasuntsua aldarrikatzen duten pegatina ezberdinak egongo dira bertan denen eskura.
Eraso sexistarik gabeko jaiak aldarrikatzeko manifestazioa egin zuten iaz jaien bezperan. Argazkia: Potxuak Martxan
Horrez gain, eraso sexisten kontrako mezuak dituen photocall-a ere egongo da nahi duenak argazkiak ateratzeko berarekin.
Autobabes plana
Indarkeria sexista gabeko guneagaz gain, beste ekintza batzuk ere gauzatu ditu Emakumea eta Berdintasun Batzordeak jaiei begira.
“Aurten lehenengoz, Antzar eguneko autobabes planean herritar eta bisitarien segurtasuna bermatzen duten eragileek (Osakidetza, SOS DEIAK, Gurutz Gorria, babes zibila, Ertzaintza, Udaltzaingoa,…) eraso sexistaren bat gertatuz gero zelan jokatu behar duten zehaztu da”, zehaztu dute.
Horrez gain, tabernari eta ferialariei taberna eta barraketako giroa alaitzeko Spotify-ko aplikazioan dagoen Beldur Barik playlist-a daukatela helarazi diete, bertan aurkituko duten abesti ez sexisten zerrenda erabiltzeko. Tabernariei, gainera, gutuna bidali diete tabernan eraso sexistaren bat gertatuz gero, zelan jokatu behar duten zehaztuz, eta Gora ligoteo sanoa, eraso sexistarik ez lelodun kartelak tabernan jartzera gonbidatu dituzte.
Bestalde, jaietako programan emakumeen kontrako indarkeriaren inguruan oharrak eta informazioa sartu dute urtero legez, eta Gora ligoteo Sanoa lelodun txapak eta puntu morea daukaten antzarretako zapiak banatzen ari dira.
Udaletxeko balkoian ere Gora ligoteo Sanoa, eraso sexistarik ez pankarta jarriko dute, udaltzainen eta SOS deiak-en telefono zenbakiekin batera.
“Emakumeen kontrako indarkeria denon ardura da, beraz edozein erasoren aurrean aktiboa izan behar da gure jarrera”, azpimarratu dute.
