Antero jaitsita, hasi dira San Antolin jaiak Lekeition

Eider Mugartegi

Lea-Artibai eta Mutriku

2016/09/01

Lekeitiarrek ongi etorri beroa eman diote gaur [irailak 1] iluntzean Anterori; Antero txamarrotia ozen entzun da Lekeitioko kaleetan. Urtero modura, Telefonikatik hasi da jaia. Azken egunetan prestatutako mozorroak soinean, plazarako ibilbidea egin dute kuadrillek dantzan, Lekitto Musika Banda eta Aittitta Makurra eta Ardoa Barrura txarangek lagunduta. Sabino Arana kaleko bazter guztiak bete egin dira kuadrillen jaitsiera ikusteko eta apurka-apurka jendez eta giro onez betetzen joan da plaza. Bittor Txakartegi Arrinda aurtengo pregoilariak txupina bota duen momentuan eztanda egin du jaiak eta kantuan eta dantzan hasi dira lekeitiarrak. Kanpai hotsagaz batera azaldu da Antero kanpandorrean eta udaletxeko balkoira ailegatu arte, plaza bete jenderen gainetik egin du hegan. Antero txikik ere agurtu ditu herritarrak balkoitik. Laugarren urtez, Paul Gerenabarrena Aboitiz izan da Antero txikia. Harriketarrak irabazle. Mozorroen sariak banatu dira ostean. Aurtengo bajadako sari nagusia Lekittostones harriketarrak eraman dute. Horrez gain, saria lortu dute bai eta Osakidetzak, Tribu taldeak eta Izar arteko fantasia mozorroek. Oihan Vegak aurkeztu ditu mozorrorik onenak eta beragaz aurrera jarraitu du jaiak.