Ondarroan da Eneko Etxaburu, ehunka herritarren ongietorria jasota

Nerea Bedialauneta

2016/09/01

Artibai ibaian gora traineruan etorri da Eneko Etxaburu, lagunekin batera. Ordurako, Ondarroako alde zaharra eta Zubi Zaharra jendez beteta zeuden preso ohiari ongietorria egiteko.

Kukaña parean egin du salto Etxaburuk, eta lurra hartu orduko bere argazkia kendu du. Argazkia kendu ondoren, Zubi Zaharraren azpirako bidea hartu du, eta horretarako, jendez betetako korridorea zeharkatu behar izan du herritarren besarkada eta musu artean. Ondarrutarra Zubi Zaharraren azpiko agertokira ailegatu denean, gainera, Ongi Etorri Eneko zioen pankarta zintzilikatu dute zubitik. Agertokira igotzeagaz batera, herriko gazteek bertso bana eskaini diote, eta ondoren, Urtza Alkortak (preso geratu zen azken ondarrutarrak) lore sorta bat eman eta Ongi Etorri Eneko zioen txapela jantzi dio. Jarraian, herriko preso eta iheslarien senideak gerturatu dira agertokira, eta guztiei krabelin bana eman eta gero, Agurra dantzatu diote.

Etxaburu traineruan ailegatu da Zubi Zaharrera

Azkenik, oparien tartea etorri da. Herri hainbat talderen eskutik opariak jaso ditu Etxaburuk, baita berekin batera sarekadan atxiolotu zituztenen eskutik ere. Tartean, bere lagunek kanturen bat edo beste ere eskaini diote. Opariak jaso ondoren, eskerrak emateko unea ailegatu da, eta Etxaburuk han batutakoei eskerrak eman nahi izan dizkie. Bereziki, etxekoak eta lagunak izan ditu gogoan. “Etxekoekin hasi, maite zaituztet, lagunekin jarraitu, lagunik onenak zaretela erakutsi duzue, eta gaurko sarrera ere horretxen eredua da”. Kartzeletan preso jarraitzen dutenak ere gogoan izan ditu, eta, era Santi beragaz egon den kidea aipatu du. “Santi modura kartzelan dauden preso, iheslari eta deportatu guztiak borrokan egin dute, eta horregatik daude gugandik urruti”, nabarmendu du. Ekitaldia triki poteoagaz amaitu dute, eta bien bitartean, preso ohiaren argazkiak kendu dituzte, tabernarik taberna. Horrez gain, hilaren 16an, Etxabururen aldeko jaia egingo dela aurreratu dute. Musika Plazan DJ Elepunto, Paranoia eta Tuboskapiren kontzertuak egongo dira.

Logroñoko kartzelatik (Errioxa, Espainia) atera bezain pronto haraino joandako senideek, lagunek eta herritarrek harrera beroa egin diote txalo zaparrada eta bolandera hotsen artean, eta jarraian Aurreskua egin diote Xeber Uribe eta Urtza Alkorta Ondarroako preso ohiek, eta ostean, lore sorta eman diote. Etxaburuk eskerrak eman izan die hara hurreratu denei.

Ondarroatik 05:30ean bi autobus bete jendek irten dute Zaldupeko zubitik, eta beste hainbat herritar autoetan gerturatu dira Errioxa aldera. Herritar horien guztien artean, gainera, berarekin espetxea berean izan ziren Anuntzi Alonso, Arnaldo Otegi eta Arkaitz Rodriguez ere egon dira. Otegik HITZAri jakitera eman dioenez, “ezusteko bat eman nahi izan diote Etxabururi”.