Atzo[irailak 8] Fibrosi Kistikoaren Eguna ospatu zuten nazioarten, eta Ondarroan ere gaixotasunaren inguruko kontzientzia hartu eta Arnasa fibrosi kistoaren elkarteari babesa emateko aukera izan zuten, elkartearen kamiseta soinean jantzita.
Arnasa elkarteko kideek 20:00etan ipini zuten argazki erraldoia ateratzeko hitzordu nagusia, eta ordurako jendetza batuta zegoen Kalekutzeko eskaileretako inguruan. “D.J. Elepunto 19:00ak inguruan hasi zen, eta horrek ere jende asko erakarri zuen Alde Zaharrera”.
Arnasakoek nabarmendu dutenez,
jende asko batu zen argazkian, iaz baino gehiago. Argazkia ateratzeaz gain, aurretik
lipdub antzerako bat grabatzeko aukera ere izan zuten. “Umeek dantza egin zuten kalekutzeko eskaileretan, eta animatu ziren herritarrek eurekin batera dantza egiteko aukera eduki zuten. Azkenean, jende guztiak dantzan amaitu genuen”.
Ondarroako Alde Zaharrean ateratako argazki erraldoia. Argazkia: Jon Andoni Arrizabalaga / Arnasa Elkartea
Noemi Uribe Arnasa elkarteko kidea ere oso pozik agertu da beste behin ere ondarrutarrek emandako babesagaz eta erakutsitako
borondate onagaz. “Izugarria da herriak ematen digun bultzada. Gero eta jende gehiago etortzen da antolatzen ditugun ekimenetara, eta oso pozgarria da horrelako erantzun ona jasotzea”.
Uribek azpimarratu duenez, horrelako egunak ospatzea garrantzitsua da gaixotasuna pairatzen dutenentzat eta baita euren ingurukoentzat ere. “Garrantzitsua iruditzen zaigu egun hauek ospatu eta gaixotasuna, egun batez bada ere, nazioartean gogoan izatea. Gu egunero bizi gara gaixotasunagaz, eta horrelako ekintzek egunerokotasunean aurrera jarraitzeko sekulako indarra ematen digute”.