Oibarko Amaren Eguna ospatu dute Gizaburuagan

2016/09/09

Jai nagusietan murgilduta jarraitzen dute Gizaburuagan. Gaur [irailak 9] jaietako azken eguna ospatu dute: Oibarko Eguna. Urtero modura, herritar asko bildu dira Oibarko ermita eta inguruetan. Herritarrez gain, alboko herrietako hainbat (Aulestikoak, Amorotokoak, Lekeitiokoak…) izan dira hitzorduari hutsik egin barik erromeriara hurreratu direnak. Aurten, gainera, jaira estreinako etorri denik ere egon da. Mendaroko bikote bat, esaterako, harrituta geratu da Oibarren aurkitu duen giroagaz. “Errepidea gurutzatu dugunean hainbeste auto ikusi ditugu inguruetan, eta geuk ere gelditzea erabaki dugu. Meza bukatzen ari zela ailegatu gara, eta bertokoek hamaiketakoan geratzeko gonbidatu gaituzte. Datorren urtean ere esperientzia errepikatuko dugula uste dugu”.

Herritarrak Oibarko ermitaren inguruan

11:30ean meza izan dute lehendabizi, eta 12:10ak inguruan elizkizunetik atera direnek ermitaren alboko zelaian egin den erromerian geratzeko aukera izan dute. Trikitilariek girotuta, hamaiketako gozoa jan eta eztarriak bustitzeko aukera izan dute bertaratutakoek, 13:30ak ingurura arte. Jaiei amaiera txokolate janagaz emango dioite iluntzean, baina aurretik ere zer ospatu egongo da herrian. 17:00etan, umeentzako puzgarriak eta jolasak egingo dira, eta 17:30ean, ostera, mus txapelketa (lau erregetara). 20:00etan, berriz, Eskobien atzetik zirko-kale antzerkiaz gozatzeko aukera izango da.

Gizaburuagako jaietako mus txapeldunak, Juan Miguel Arostegi alkateagaz. Argazkia: Gizaburuagako Udala

Karta jokoei dagokionez, 66 bikotek parte hartu dute jaietako mus eta brixka txapelketetan. Zehatz esateko, brixka txapelketan 44 bikotek parte hartu zuten, eta mus txapelketan, ostera, 22 bikotek. Mus txapelketa Rufino eta Jose Luisek irabazi zuten, eta bigarren sailkatu ziren Amoto eta Laka. [ALBISTE HONEGAZ LOTUTA] Luis Mari Lenizek irabazi du Gizaburuagako jaietako txapel jaurtiketa