Ondarroako Gaztelekua zabalduko dute berriro, jaialdi eta guzti
Barikuan [irailak 30] irekiko ditu berriro ateak Ondarroako Gaztelekuak, eta gazteek aurrerantzean zer egin nahi duten zehazteko, irekiera festa antolatu du Ondarroako Udalak. Hala, barikutik domekara [urriak 2] bitartean, hainbat ekintzaz gozatzeko aukera egongo dela aurreratu dute.
Barikuan, 17:00etan egingo da irekiera jaia, eta ostean, 17:30ean, txokolate janagaz jarraituko dute ospakizunek. 18:00etan, berriz, ping-pong txapelketa egingo dute, eta hortik aurrera musika, jolasak eta hainbat ezusteko egongo direla nabarmendu dute. Zapatuan [urriak 1] eta domekan [urriak 2], aldiz, Gaztelekua erabiltzaileen beharrizanetara egokitzeko auzolana egingo dute.
Udal ordezkariek jakitera eman dutenez, iniziatiba berriak lau hilabeteko iraupena izango du, eta hausnarketa eta funtzionamendu berria Gaztelekuko erabiltzaileekin batera adostuko dira. “Azken ikasturtean zabaldutako hausnarketaren ostean, Gaztelekuaren funtzionamendua hobetzeko aldaketak adostu ditu Hezkuntza Batzordeak. Hori dela eta, irailetik abendura bitartean Barnetegiko lagunekin batera proba gisa, gai zehatz baten inguruko asteburuak antolatuko dira”.
Abenduan probarako epea amaitutakoan balorazioa egiteko tartea hartuko dute Gaztelekuaren erabiltzaile eta kudeatzaileek. “Guztien iritzi eta bizipenak jasotakoan Gaztelekuaren erabilera berria eta aurrera begirako helburuak definitiko dira”.
Barnetegiko kideak eta Ondarroako udal ordezkariak irekiera festarako deia egiten. Argazkia: Ondarroako Udala
