Zesta-punta munduratzen ari da Xistera
Zesta punta zabaldu eta mundu osoan ezagutzera emateko asmoz, Energia erangikorrari lotutako Europako proiektu bateko kideei erakustaldia eskaini die Xisterak. Horrela, Belgika, Holanda, Polonia, Alemania eta Finlandiatik etorritako hainbat ikertzaileek zesta-punta bertatik bertara ezagutzeko aukera izan dute Felix Larrinaga pilotari ohi markina-xemeindarraren eskutik.
Xistera proiektuaren barruan, enpresei aukera ematen zaie Euskadin bisitan dauden langileak zein bertako langileei zuzendutako zesta punta erakustaldiak antolatzeko. Kasu honetan, Mondragon korporazioak, Mondragon unibertsitateak eta LKS injeniaritzak parte hartzen duten energia eraginkorreko Europako proiektu bateko kideak izan dira Galarreta frontoira hurbildu eta kirol hau lehen eskutik ezagutzeko aukera izan dutenak.
Mondragon Unibertsitateko ikertzaileetako bat Felix Larrinaga denez, Xisteraren eskutik eta bere laguntzagaz zesta punta zuzenean bizi ahal izan dute. Proiektuko ikertzaileek Lizasoain eta Santacruz bikoteraren eta Alain eta Alberroren arteko partida ikusi zuten, Larrinagak jokoaren araudiak, zestak eta pilotak zelan egiten diren, Xistera proiektua zertan datzan, eta neurketa hasi aurretik pilotariek zelan agurtu behar duten azaltzen zizkien bitartean.
Norgehiagokaren ondoren, gainera, zestaz aproba egitera ausartu ziren. Euskal pilotako modalitaterik zaharrena den kirola ezagutzera emateko antolatutako lehen erakustaldia arrakastatsua izan dela adierazi du Xisterak.
Xisteraren erakustaldian parte hartu zutenak. Tartean, Felix Larrinaga markina-xemeindarra. Argazkia: Xistera
