Azken minutuan ihes egin dio garaipenak Aurrerari
Joseba Plazaren mutilak zapatuan [urriak 1] Pasaiaren aurka jokatutako partida osoan nagusi izan baziren ere, berdinketagaz konformatu behar izan zuten. Hain zuzen ere, bina berdindu zuten talde gipuzkoarraren aurka. Aurrerako ordezkariek nabarmendu dutenez, azken minutuan bi punto galtzea “oso tristea” izan zen.
Lehen minututik Aurrerakoak nagusi izan ziren Zaldupen, hala ere, Pasaia aurreratu zen markagailuan. Talde gipuzkoarrak aukera izan zuen une bakarrean sartu zuen norgehiagokako lehen gola, 16. minutuan. Talde bisitariak zelai erdian baloia lapurtu zuen, eta kontraerasoan sartu zuten lehen gola.
Markagailua aurka eduki baldin bazuen ere, etxeko taldeak ez zuen amore eman, eta talde modura beharra eginda aurkaria euren jokoan sartzea lortu zuen. Hurrengo minutuetan gol aukera asko izan zituen Aurrerak, baina ez zuten asmatzerik eduki. Azkenean, lehen zatia amaitzen ari zela ailegatu zen berdinketa, Unai Jauregi Tubo-k 44. minutuan sartutako golari esker.
Atsedenaldia eta gero, berehala ailegatu zuen etxekoen bigarren gola, baina epaileak baliogabetu egin zuen. Hala ere, minutu bat beranduago 2-1ekoa egin zuen Julen Arufek, urruntze bat kontrolatu eta atetik 25 bat metrora egindako jaurtiketari esker.
Bigarren gola sartu ostean, Aurrerak konfidantza irabazi zuen, eta hainbat gol aukera sortu bazituen ere, ez zuen aurkariaren sarea zulatzeko beste aukerarik eduki. 63. minutuan, gainera, Tubori partidako bigarren txartel horia atera zioten, eta Aurrera nagusi bazen ere, bat gehiagogaz Pasaia lasaiago jokatzen hasi zen.
Azkenik, luzapenean, 94. minutuan, etorri zen biko berdinketa. Aurrerako atzelari batek mina hartu zuen, eta horrek ere bigarren gola egiteko gauzak erraztu zizkioin Pasaiari.
Aurrerak Pasaiaren aurka jokatutako norgehiagoka. Argazkia: Aurrera
