Lea-Artibaiko erretiratuek Pertsona Nagusien Naziorteko Eguna ospatu dute
Itsas Baserri Lea-Artibaiko erretiratuen elkarteko kideek Lekeitiotik Gizaburuagara arteko bidea egin zuten zapatuan [urriak 1]. Elkarteko ordezkariek jakin eragin dutenez, 80 pertsona inguru bildu ziren. Mendexako zubian batu eta Lea ibilbidetik egin zuten ibilbidea.
Irteera, hain zuzen ere, Pertsona Nagusien Naziorteko Eguna ospatzeko egin zutela azaldu dute; egun hori urriaren 1a izaten da.
Gizaburuagara heldu eta gero, pintxo batzuk jan zituzten parte hartzaileek.
Urriak 6 (eguena), koruen kontzertua. Horrez gain, urriaren 6an, 19:00etan, Lekeitio, Berriatua eta Larrabetzuko koruek kontzertua eskainiko dute Lekeitioko Ikusgarrin. Emanaldia Nagusiak Bizkaia mailako erretiratuen elkarteak eta Lea-Artibaiko erretiratuen elkarteak elkarlanean antolatuta dago.
Kontzertua doakoa izango dela eta herritarrei bertara joaten gonbitea egin diete antolatzaileek. “Guk beti eskatu eta eskertu egiten dugu. Eskatzen diogu jendeari antolatutako kontzertua ikustera joateko, eta aldi berean, joaten direnei eskerrak ematen dizkiegu”.
Itsas baserri Lea-Artibaiko jubilatuen elkartearen irteera bat
